自願醫保
自願醫保包精神科住院治療 門診心理輔導未必賠
世衛估計去到2020年，抑鬱症將會躍升至全球第二大疾病，僅次於心血管疾病。根據食衞局認可產品保單範本，自願醫保產品只會賠償受保人喺專科醫生建議下，喺香港境内住院接受精神科治療所收取嘅合資格費用……
都市人生活節奏急促，喺追求物質同經濟需要嘅同時，難免忽略咗精神同心理健康。世界衛生組織資料顯示，全球有超過3億人患有抑鬱症，每年更有多達80萬人因此而自殺身亡。世衛估計去到2020年，抑鬱症將會躍升至全球第二大疾病，僅次於心血管疾病。
喺香港，公立醫院精神科日間醫院喺2017/18年度就診人次超過22萬2千人，比起6年前增加近一成九，可見精神科治療服務愈趨緊張。當人處於精神失控狀態，身體受傷嘅風險亦會隨之而增加。
因此，市面上一般嘅醫療保險，只有部分承保因精神病或精神分裂而導致嘅住院費用。而新推出嘅自願醫保計劃，食物及衞生局就要求有關產品涵蓋最少$3萬嘅「精神科治療」保障。
自願醫保表面上有效堵塞保障漏洞，但根據食衞局嘅認可產品保單範本，產品只會賠償受保人喺專科醫生建議下，喺香港境内住院接受精神科治療所收取嘅合資格費用。
換句話講，保單只會承保因精神科治療而入院嘅醫療支出；至於其他精神科相關嘅治療開支，例如係日間門診同心理輔導等，若果唔涉及住院治療，就好大機會唔符合申請索償嘅資格。
精神病種類繁多，複雜程度絕對不下於其他嚴重疾病，及早發現先可以對症下藥。除咗公立醫院，患者經私人執業專科醫生轉介之下，亦可以去私家醫院或者診所接受精神科住院治療。
詳情請參閱香港心理衞生會資料。
延伸閱讀
本文章內容由 imSure 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。
相關文章
其他話題