> ## Content Index
> Fetch the complete content index at: https://www.bowtie.com.hk/learn/llms.txt
> Use this file to discover other available public pages before exploring further.

# 【減肥餐單】制定Keep Fit計劃前 營養師幫你糾正6大致肥誤解！
- URL: https://www.bowtie.com.hk/learn/減肥-計劃前-營養師-糾正-致肥-誤解/
- Published: 2019-04-03T08:20:13.000Z
- Updated: 2026-11-17T02:24:45.000Z
- Description: 香港人越嚟越注重身型同健康，個個都話要減肥，各施各法。有啲人一日三餐跟足減肥餐單食嘢、有人狂做運動、有人甚至去食減肥藥，但都唔一定成功。今次Bowtie就請嚟註冊營養師MasterJack，為你糾正致肥誤解！
- Author: MasterJack
- Tags: 營養貼士

個個都減肥，唔通個個都想減肥咩？不論係男女老幼，香港人都愈來愈注重身型同健康，個個都話要減肥，各施各法。有啲人一日三餐跟足減肥餐單食嘢、有人狂做運動、有人甚至去食減肥藥，但都唔一定成功。今次Bowtie就請嚟註冊營養師MasterJack，為你糾正致肥誤解！

## 1\. 飲啤酒最易肥？

MasterJack：其實都係睇你飲幾多嘅啫。酒類飲品嘅熱量來源主要嚟自酒精。所以喺同等份量下，酒精濃度越高嘅話，熱量就會愈高。一齊睇吓個表：

| 每100ml（酒精濃度） | 啤酒 （4-4.9%） | 紅酒（12%） | 威士忌（40%） |
| ------------ | ----------- | ------- | -------- |
| 熱量（千卡路里）     | 36.6        | 79.4    | 205      |

如果只係飲100ml，咁啤酒嘅熱量絕對會係最低。不過，現實係好多時候飲啤酒嘅朋友都飲多過一罐，有時候甚至飲兩大杯（2 Imperial Pint係1,136ml，2 US Pint係946ml），咁就360Kcal 㗎喇。所以話怕肥唔飲啤酒嘅朋友某程度上都啱嘅，避免自己飲多咗嘛。

另外補充少少，好多人話啤酒糖份多所以肥，呢樣就唔啱啦，頭先講咗酒精先係主要熱量嘅來源，啤酒入面嘅糖份係每100ml大約2g左右，即係8Kcal啫。

## 2\. 淨係做運動唔節食就減到肥？

MasterJack：其實完全靠運動嚟減肥係非常唔乎合經濟原則（成本效益）。

好簡單一個事實：一個160磅嘅人去健身室舉重1個鐘可以消耗到230Kcal（1）。一碗腩肉墨魚丸麻辣湯底米線嘅熱量係830Kcal（2）， 求其一間粉麵舖嘅一碗雲吞麵熱量就係300Kcal（2）， 即係話同樣係食碗麵， 你揀錯咗嘅話，果日就要去健身房舉2個鐘頭18分鐘嘅鐵嚟抵消返。 試問公務咁繁重嘅你又點可以再抽到呢啲時間出嚟呢。

但你千祈唔好誤會， 我唔係叫大家唔好做運動，反而非常鼓勵大家做運動。因為你只能夠透過做運動嚟改善心肺功能。只不過一心諗住運動就係減肥嘅全部的話，你就有啲被誤導啦。就減肥學嚟講，最重要始終都係飲食行先。

**延伸閱讀**

- [【BMI 計算機】一文認識計算方法、男女正常標準！](https://www.bowtie.com.hk/blog/zh/bmi/?ref=bowtie.com.hk)
- [【做 GYM 減肥】10 大健身中心收費模式、分店、試玩優惠大比拼！](https://www.bowtie.com.hk/blog/zh/%e5%81%9agym-%e6%b8%9b%e8%82%a5-%e5%85%a8%e6%b8%af8%e5%a4%a7-%e5%81%a5%e8%ba%ab%e4%b8%ad%e5%bf%83-%e6%94%b6%e8%b2%bb%e6%a8%a1%e5%bc%8f-%e5%88%86%e5%ba%97-%e8%a9%a6%e7%8e%a9/?ref=bowtie.com.hk)

## 3\. 食白飯係致肥元兇？

MasterJack：終於都等到你問呢條問題啦! 錯囉，錯晒！食紅米唔會肥，食糙米唔會肥，食白米都唔會肥。睇睇下面:

| **營養成份** | **提供熱量（每1克）** |
| -------- | ------------- |
| 碳水化合物    | 4Kcal         |
| 蛋白質      | 4Kcal         |
| 脂肪       | 9Kcal         |
| 酒精       | 7Kcal         |

一睇個表就一目了然啦， 齋講熱量嘅話，幾時都唔輪到碳水化合物排第一，所以飯點會係致肥元兇？一碗飯嘅熱量其實大約係200Kcal左右，就算你一日三餐都食碗飯，都係600Kcal左右，所以一定係你平時食嘅餸比較肥。

可能會有人話：「唔係喎，食多咗嘅碳水化合物，用唔晒嘅話身體咪會將佢轉成脂肪儲起囉， 咁就會肥啦！」

的而且確， 身體係有機制將單糖轉成脂肪， 但其實因為個機制好複雜同埋好浪費資源嘅關係（身體要將單糖變成脂肪酸，過程係需要用能量㗎。即係用能量去轉化能量，身體其實都會覺得好無聊，好唔合成本效益），所以只係有好少部份多餘咗出嚟嘅碳水化合物， 先會被轉成脂肪儲起（3）。

相反，人類嘅腸胃係可以好有效率咁吸收食物入面嘅脂肪，用唔晒就簡單直接咁儲起。咁你話啦，食碳水化合物易肥，定係食脂肪易肥？

## 4\. 太夜食飯都會肥？

MasterJack：夜食飯係唔會令到你肥，但係如果夜食飯，而又令你選擇一啲無咁健康嘅食物，咁就會令到你肥啦。

觀察性研究顯示晚飯時間與[肥胖](https://greenutss.com/blog/%e7%99%a1%e8%82%a5/?ref=bowtie.com.hk)係無關連㗎（4），個研究搵咗兩班小朋友，一班就係夜晚8點前食飯，另一班就係夜晚8點後先食飯，結果係搵唔到晚飯時間同肥胖有關連㗎。

相反，有大量研究顯示始終都係食物入面嘅熱量先會引致肥胖（5）。所以，要返夜嘅朋友或者晏收工嘅你都唔好太怪罪自己份工，只要唔好亂食嘢就唔會肥。

![減肥攻略-制定計劃前營養師幫你糾正致肥誤解](https://www.bowtie.com.hk/gh/content/images/2026/11/B1.png)

## 5\. 食齋無咁肥？

MasterJack：如果你以為食齋無咁肥，咁就大錯特錯啦。「食齋」呢兩隻字其實好廣泛，純素主義（Vegan）、蛋素主義（ovo-vegetarianism）、奶素主義（lacto-vegetarianism）、奶蛋素主義（ovo-lacto-vegetarianism），仲有會食海產嘅（semi-vegetarianism）等等，通通都係「食齋」。

唔同嘅食齋方式老老實實又真係會對你嘅營養攝取有好大嘅影響，深到直頭可以寫篇論文。不過無論邊種「食齋」都好，其實點樣煮先係關鍵。舉個例，羅漢齋炒麵係齋菜，一碟有成850Kcal，一份冷蕎麥麵（醒唔醒起佢都係齋先？），先得300Kcal。其他齋舖啲素肉好多都係預先炸過，吸晒油，我就唔使多講啦。所以我覺得「食齋」就唔一定無咁肥嘅。

## 6\. 唔食早餐可以減肥？

MasterJack：我只可以答你唔會，而且仲會更加肥，更加唔健康。根據小弟嘅經驗，普遍嚟搵我幫手減肥嘅朋友，見我之前每日都係食得好少餐，而且好多都係無食早餐嘅習慣。當我叫佢哋食返早餐，同埋仲要每日食好多餐之後，全部都開始減到磅。

其實你要明白，減肥唔係要盲目追求食少啲熱量（卡路里）。我哋人類其實好先進，識得自我適應同調節。有樣嘢叫新陳代謝，佢主宰住我哋每日要用幾多能量。

當我哋食少咗，新陳代謝其實係會減慢啲去慳住嚟用，到你再食嘢嘅時候，身體會更加吸收，令到你儲起更加多。所以你越唔食嘢，最終只會越肥，你係唔夠自己嘅「新陳代謝」鬥㗎，所以你係要同佢做好朋友，令佢轉換快啲去幫你減肥。

總括嚟講，由早餐開始做起，少食多餐，先可以幫到你改善新陳代謝，幫你加快消脂。

**延伸閱讀**

- [【卡路里】減肥淨係睇熱量？營養師教你 5 大健康飲食秘技！](https://www.bowtie.com.hk/blog/zh/%e5%8d%a1%e8%b7%af%e9%87%8c-%e6%b8%9b%e8%82%a5-%e6%b7%a8%e4%bf%82%e7%9d%87-%e7%86%b1%e9%87%8f-%e7%87%9f%e9%a4%8a%e5%b8%ab-%e5%81%a5%e5%ba%b7%e9%a3%b2%e9%a3%9f/?ref=bowtie.com.hk)
- [什麼是生酮飲食法？能否長期減肥？營養師同你分析利弊！](https://www.bowtie.com.hk/blog/zh/%e7%94%9f%e9%85%ae%e9%a3%b2%e9%a3%9f/?ref=bowtie.com.hk)
- [【營養師做啲咩？】了解政府醫院營養師的日常！](https://www.bowtie.com.hk/blog/zh/%e7%87%9f%e9%a4%8a%e5%b8%ab-%e6%94%bf%e5%ba%9c%e9%86%ab%e9%99%a2/?ref=bowtie.com.hk)
- [【早餐推介】營養師精選 5 大健康早餐食譜！](https://www.bowtie.com.hk/blog/zh/%e6%97%a9%e9%a4%90%e6%8e%a8%e4%bb%8b-%e5%94%94%e9%a3%9f%e6%97%a9%e9%a4%90%e4%bb%b2%e8%82%a5-%e7%87%9f%e9%a4%8a%e5%b8%ab-%e7%b2%be%e9%81%b8%e6%97%a9%e9%a4%90%e9%a3%9f%e8%ad%9c/?ref=bowtie.com.hk)

資料來源

- 1[World Cancer Research Fund. Exercise Calorie Calculator.\[Internet\]. Wcrf-uk.org. 2019 \[cited 31 March 2019\].](https://www.wcrf-uk.org/uk/here-help/health-tools/exercise-calorie-calculator?ref=bowtie.com.hk)
- 2[Centre for Food Safety. Sodium and Energy Contents of Asian-style Noodles-in-soup Dishes - Result of Joint Study by the Centre for Food Safety and the Consumer Council \[Internet\]. Cfs.gov.hk. 2019 \[cited 25 March 2019\].](https://www.cfs.gov.hk/english/nutrient/files/Asian-style%20Noodles-in-soup%20Dishes%5FEng.pdf?ref=bowtie.com.hk)
- 3Solinas G, Borén J, Dulloo A. De novo lipogenesis in metabolic homeostasis: More friend than foe?. Molecular Metabolism. 2015;4（5）:367-377.
- 4Coulthard J, Pot G. The timing of the evening meal: how is this associated with weight status in UK children?. British Journal of Nutrition. 2016;115（09）:1616-1622.
- 5Baron K, Reid K, Horn L, Zee P. Contribution of evening macronutrient intake to total caloric intake and body mass index. Appetite. 2013;60:246-251.

本文章內容由 MasterJack 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。此文章內任何與 Bowtie 產品相關的內容僅供參考及作教育用途，客戶應參閱相關產品網頁內詳細之條款及細則。