> ## Content Index
> Fetch the complete content index at: https://www.bowtie.com.hk/learn/llms.txt
> Use this file to discover other available public pages before exploring further.

# 【營養師做啲咩？】了解政府醫院營養師的日常！
- URL: https://www.bowtie.com.hk/learn/營養師-政府醫院/
- Published: 2019-06-11T08:48:46.000Z
- Updated: 2026-11-16T04:53:16.000Z
- Description: MasterJack近期喺Bowtie同大家都分享咗唔少健康飲食嘅Tips，今次就講吓佢嘅工作 — 營養師！普遍香港人對營養師嘅認知僅限於「減肥瘦身」、「變大隻」同令你「冇啖好食」。其實營養師每日嘅工作並唔係咁流於表面，一個好嘅營養師更加係要令你可以食得更開心、更放心同更健康。
- Author: MasterJack
- Tags: 營養貼士

近期喺Bowtie同大家都分享咗唔少健康飲食嘅Tips，今次就等我講吓我嘅工作 — 營養師啦！我相信普遍香港人對營養師嘅認知都僅限於「減肥瘦身」同埋「變大隻」。對我哋嘅觀感就係我哋令你「冇啖好食」。其實營養師每日嘅工作並唔係咁流於表面，一個好嘅營養師反而係要令你可以食得更開心、更放心同更健康。

## 營養師 ≠ 營養學家

如果你仲係認為我哋淨係識幫人增肥同減肥嘅話，可能你仲未搞清楚「營養師」呢個名銜。我哋不如轉一轉Channel講返英文，大家可能會容易啲理解。

喺英語系國家，**營養師**係Dietitian/ Dietician（香港地太多人魚目混珠，亂叫自己做營養師，所以真果啲唯有叫自己做註冊營養師），而**營養學家**就係Nutritionist。

營養師（Dietitian）係接受過臨床營養學訓練，能夠處方醫學營養治療去治理同幫助病人嘅職業，而營養學家（Nutritionist）則係泛指所有對營養學有認識嘅人。

換句話講，你阿媽、你小學老師，或者係收音機講緊嘢嗰個DJ都可以叫自己做營養學家。好多時候你聽到同睇到嘅文章同報導，都未必係註冊營養師講或者寫嘅（因為我哋平時實在太忙啦），多數係營養學家比較願意接受採訪同寫文。

要留意返，我哋註冊營養師同營養學家嘅技能係有分別嘅。我舉個例子，即係醫生同科學家咁，大家可能都熟識心臟嘅結構同運作，科學家嘅知識可能仲深入啲添，有可能係因為佢咁啱有個研究心臟肌肉嘅博士學位。

不過，假如你個心痛，你都係會去搵醫生，而唔係去搵果個博士啦，因為醫生係接受過臨床訓練嘅，識得利用專業知識去醫你。

唔知點解？人有病好自然識去睇醫生，但到有營養問題嗰陣，大家又未必識去見營養師。或者係由於市民嘅認知問題，希望我可以喺往後嘅日子慢慢同大家解釋多啲。

當大家大概識得分營養師同營養學家之後，我會再講吓營養師究竟做啲咩。

## 駐院營養師有咩工作？

註冊營養師嘅工作主要有3大唔同範疇，當中包括：臨床營養 (Clinical Dietetics)、社區營養 (Community Dietetics)及餐飲服務 (Foodservice)。而我呢，即係駐院嘅註冊營養師，主要係為住院同門診嘅病人提供臨床營養服務。

咁我哋即係會為住院病人做啲咩呢？試想像吓，深切治療部入面嘅病人，不論佢哋係昏迷當中，定係被麻醉咗，都會無咗進食嘅能力。呢個時候就要由我哋為佢哋安排「營養」，利用其他途徑，例如靜脈注射，或者經鼻胃管（一條由鼻孔插入，直通到個胃嘅膠管），嚟為病人提供每日所需嘅營養。

你可能會諗︰病咗咪食少幾日囉，有咩所謂？之後食返咪得……咁就大錯特錯啦！

上千個研究都明確指出，病人喺病重嘅時候越遲接收到營養，佢哋就會越難康復，所以喺合適嘅時間向病人提供合適嘅營養係非常緊要㗎。話時話，我哋有時仲會用啲專門嘅營養素嚟去幫病人，等佢哋再好得快啲添。

## 營養師並非淨係幫人減肥

咁門診病人又點呢？ 門診服務就比較貼近大家普遍對我哋嘅認知，即係一對一同病人見面。只不過喺醫院入面，我哋反而比較少睇啲淨係要減肥嘅朋友，多數係睇啲有慢性疾病嘅朋友。

因為佢哋嘅需要比較急切啲，例如係有糖尿病、心臟病、曾經中過風嘅人、癌症病人，又或者係準備做手術嘅病人。我哋會教佢哋點樣食嘢去改善病情、減慢病情惡化、搞好身體狀態去做手術。當然，有部份病人同時都有超重嘅問題。如果減磅係治療嘅重要一環，我哋就會以一個Package咁去幫佢哋。而我每日就有大約兩個鐘時間係「坐門診」嘅。

## 公立醫院營養師一人睇幾十個病人

好啦，咁工作嘅時間分配又係點呢？當然，唔同醫院會有唔同嘅Supply and Demand啦。我自己就喺政府醫院工作嘅，大部時間都係服務住院嘅病人。而每個註冊營養師要負責幾間病房，每間病房大約有幾十個病人，我哋每日喺每個病房都要睇一部份病人，所以「好生意」（即係多轉介）起上嚟真係忙到「甩碌」㗎。

雖然上頭預我哋半個鐘就可以睇完一個症，但其實每個症複雜程度都唔同。有啲病人講到嘢；有啲就講唔到嘢。有啲病人家屬好合作；有啲又唔多合作。呢啲因素加加埋埋就會影響每個症所需嘅時間。

我成日遇到嘅情況係︰病人中左風入院，但又為食，唔肯食醫院餐，跟住佢哋嘅屋企人就會係醫院Canteen買焗豬扒飯、燒味飯俾個病人食，真係救命！我都唔知話個病人好，定係話佢屋企人啦。

- 註：好多時病人中風後，佢嘅吞嚥能力係會出現問題，係食唔到豬扒住㗎。所以其實醫院賣快餐都幾反智……

今次講住咁多先，下次再同大家分享其他關於營養師嘅有趣事！

**延伸閱讀**

- [【減肥餐單】制定 Keep Fit 計劃前 營養師幫你糾正 6 大致肥誤解！](https://www.bowtie.com.hk/blog/zh/%e6%b8%9b%e8%82%a5-%e8%a8%88%e5%8a%83%e5%89%8d-%e7%87%9f%e9%a4%8a%e5%b8%ab-%e7%b3%be%e6%ad%a3-%e8%87%b4%e8%82%a5-%e8%aa%a4%e8%a7%a3/?ref=bowtie.com.hk)
- [【卡路里】減肥淨係睇熱量？營養師教你 5 大健康飲食秘技！](https://www.bowtie.com.hk/blog/zh/%e5%8d%a1%e8%b7%af%e9%87%8c-%e6%b8%9b%e8%82%a5-%e6%b7%a8%e4%bf%82%e7%9d%87-%e7%86%b1%e9%87%8f-%e7%87%9f%e9%a4%8a%e5%b8%ab-%e5%81%a5%e5%ba%b7%e9%a3%b2%e9%a3%9f/?ref=bowtie.com.hk)
- [【早餐推介】營養師精選 5 大健康早餐食譜！](https://www.bowtie.com.hk/blog/zh/%e6%97%a9%e9%a4%90%e6%8e%a8%e4%bb%8b-%e5%94%94%e9%a3%9f%e6%97%a9%e9%a4%90%e4%bb%b2%e8%82%a5-%e7%87%9f%e9%a4%8a%e5%b8%ab-%e7%b2%be%e9%81%b8%e6%97%a9%e9%a4%90%e9%a3%9f%e8%ad%9c/?ref=bowtie.com.hk)
- [【茶餐廳】食晏唔想肥？睇吓營養師 5 大健康午餐之選！](https://www.bowtie.com.hk/blog/zh/%e8%8c%b6%e9%a4%90%e5%bb%b3-%e9%a3%9f%e6%99%8f%e5%94%94%e6%83%b3%e8%82%a5-%e7%9d%87%e5%90%93%e7%87%9f%e9%a4%8a%e5%b8%ab%e5%81%a5%e5%ba%b7%e5%8d%88%e9%a4%90%e4%b9%8b%e9%81%b8/?ref=bowtie.com.hk)

本文章內容由 MasterJack 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。此文章內任何與 Bowtie 產品相關的內容僅供參考及作教育用途，客戶應參閱相關產品網頁內詳細之條款及細則。