> ## Content Index
> Fetch the complete content index at: https://www.bowtie.com.hk/learn/llms.txt
> Use this file to discover other available public pages before exploring further.

# 《#精算仔，傾吓偈》 - 15位精算師點揀醫療保險
- URL: https://www.bowtie.com.hk/learn/精算仔-傾吓偈-15位-精算師-點揀-醫療保險/
- Published: 2019-04-25T09:29:22.000Z
- Updated: 2026-11-18T02:40:46.000Z
- Description: 打煲呔的精算師搵咗身邊15個持牌精算朋友仔，訪問佢哋自己會點樣揀醫療保險！
- Author: Bowtie 團隊
- Tags: 保險知識

打煲呔的精算師搵咗身邊15個持牌精算朋友仔，訪問佢哋自己會點樣揀醫療保險！

自從攞咗牌之後，我哋依幾個月都不停咁同啲潛在顧客傾計，想知佢哋對[醫療保險](https://www.bowtie.com.hk/zh/resources/health-insurance?ref=bowtie.com.hk)嘅睇法，當中包括唔同背景嘅朋友，有專業人士，有做開科技行業，有行山「腳」，甚至乎Uber 司機，通常年紀大都會好支持醫療保險，因為病過先有危機感。後生果班通常未諗，30歲前都覺得自己係「無敵」。

當中唔少朋友都對醫保有頗深誤解，對醫療體系認知甚少，有啲對保險本身仲好抗拒，亦有啲自覺需要醫保但係一知半解。可能係因為，比其他國家，香港網上真係相對上少保險嘅資訊同分析，好多時候要都要靠[agent](https://www.bowtie.com.hk/blog/zh/%e4%bf%9d%e9%9a%aa%e4%b8%ad%e4%bb%8b-%e7%b6%93%e7%b4%80-%e4%bb%a3%e7%90%86/?ref=bowtie.com.hk)解釋。

## 關於醫療保險，原來行內人咁睇...

有見及此，見拜年嗰排冇乜嘢做，我哋搵咗身邊15個持牌精算朋友仔，訪問佢哋自己會點樣揀醫療保險(主要係住院同手術)，因為佢哋出名精打細算又熟行情，絕對有唔少Insight可以分享。

一冇數計就覺得好寂寞嘅佢哋，好快就答晒我啲問題。佢哋嚟自各大寶號，或者顧問公司，唔同國家，唔同grade，由啱啱攞到FSA/FIA牌至到退咗休都有。 加埋係幾百年經驗，點都值得用幾分鐘參考吓:

**延伸閱讀**

- [【手術費】比較香港 13 間私家醫院常見手術收費及套餐價錢！](https://www.bowtie.com.hk/blog/zh/%e6%89%8b%e8%a1%93%e8%b2%bb-%e5%a5%97%e9%a4%90%e5%83%b9%e9%8c%a2-%e6%af%94%e8%bc%83-%e9%a6%99%e6%b8%af-%e7%a7%81%e5%ae%b6%e9%86%ab%e9%99%a2-%e5%b8%b8%e8%a6%8b-%e6%89%8b%e8%a1%93%e6%94%b6%e8%b2%bb/?ref=bowtie.com.hk)

## 常見問題

### 你覺得大眾對醫療保險有咩誤解?

**遠赴香港拜年嘅外國精算師**︰「唔一定要將醫療（保障）同投資連埋一齊，醫療還醫療，投資還投資。冇錯，到最後有錢攞返係好似好吸引，但係「羊毛出自羊身上」，扣除佣金之後，投資型產品啲性價比唔一定高。」

**產品精算師**︰「一，好多人都以為醫療保險係會全數賠償，其實只局限於「必要性醫療」事項，兼且有賠償上限，如果唔係保費會好貴。二，醫療保險保費同埋條款並唔係guarantee，保險公司有權加價，尤其是當醫療通脹錄得雙位數字升幅。三，好多人都分唔到[危疾](https://www.bowtie.com.hk/blog/zh/learn/%e5%8d%b1%e7%96%be%e4%bf%9d%e9%9a%aa/?ref=bowtie.com.hk)同[醫療保險](https://www.bowtie.com.hk/blog/zh/learn/%e9%86%ab%e7%99%82%e4%bf%9d%e9%9a%aa/?ref=bowtie.com.hk)。醫療保險係實報實銷，有上限賠償但係每年更新，通常是保證續保。危疾通常一次性現金賠償(或多重賠償)，賠完之後就買唔番㗎啦。要小心分清楚啊。」

**會考10A嘅精算師**︰「買保險冇得賠就好似好唔抵咁？其實冇得賠係一件好事， 我心諗乜你好想claim咩……」

### 你覺得自己需唔需要個人醫療保險？

**資深精算師**︰「除咗公司果份，好多行家都會買份最基本嘅住院保障做[top-up](https://www.bowtie.com.hk/blog/zh/%e5%85%ac%e5%8f%b8%e9%86%ab%e4%bf%9d-top-up-%e9%86%ab%e7%99%82%e4%bf%9d%e9%9a%aa/?ref=bowtie.com.hk)，唔需要買太貴，簡單一份跟身，有事claim咗公司先，再claim自己果份。」

**顧問精算師**︰「好多精算師都有份穩定嘅工作，喺大公司做，份團體醫療通常都唔錯。Watch out公司醫療嘅賠償上限，可能要買份去彌補不足。另外，如果你係工作期間中危疾例如心臟病，之後自己就買唔番份個人保險啦。」

**退休精算師語重心長咁講**︰「保險係風險管理，啲簡單傷風咳嘅門診費用可以自己搞掂。理論上，「高頻率，低損失」嘅應該自己埋單。要買就cover啲主要昂貴嘅大手術。而醫療保險就正正將健康風險有效率咁轉介畀保險公司，符合經濟效益。 」（原稿有成兩版幾紙，果然係前輩！）

**來自北美嘅精算朋友**︰「買醫保其實係為咗保險公司嘅「一世續保承諾」 – 即係公司無法因個人醫療索償而拒保或加價。冇錯保險公司係會每年根據整體風險池而去決定加唔加價，但只要你每年準時交保費，可以保到80至100歲，其實好抵玩。」

### 你會點樣揀醫療保險？

**港大首屆精算畢業生笑住講**︰「我自己會買大房(級別保障)，因為性價比高。對我來講最緊要保障額夠，寧願啲錢去醫病同做手術，唔使住太靚啦，最好快啲走。我自己會咁諗，但係我老婆應該會揀私家房。」

**風趣幽默精算師**︰「其實就好難比較得仔細，隻隻plan都係抄來抄去。最緊要都係睇最大嗰幾個項目，例如房錢，醫生費，手術費，每年或者終身賠償上限。其實每年60至80萬已經好夠，唔需要吓吓買到話成幾千萬同成億終身保障咁高，你永遠都用唔晒，除非你中咗50次[肺癌](https://www.bowtie.com.hk/blog/zh/%e8%82%ba%e7%99%8c-%e7%97%87%e7%8b%80-%e6%aa%a2%e6%9f%a5-%e6%b2%bb%e7%99%82-%e9%a0%90%e9%98%b2/?ref=bowtie.com.hk)啦！（笑咗）」

**精算系教授**︰「始終係行家，所以會精算師上身，開張excel比較多隻產品，我會追求性價比及透明度，最好保障同埋投資淸楚分開。而醫療保險係實報實銷，就做到呢個效果。」（訪問時後堅持要分享張excel畀我做紀念）

**第15個受訪嘅精算師**︰「有團體醫療，但都應該買份墊底費比較高嘅醫療保險. 冇墊底費嗰啲通常都比較貴……」

**澳洲精算小富婆**︰「我冇乜諗咁多，反而自己afford到，就買咗份無limit嘅high-end醫療保險。個保障係最靚，雖然貴啲。不過，只要佢每年加價唔會太多，我承擔到就冇乜所謂。 喂，唔講啦，我要去做yoga。」 （聽得出佢呢排搵唔少）

### 你會買醫療定係危疾先?

**再保公司精算師**︰「當然係買咗醫療保險先啦，有住院同手術費賠償，打個底安心啲。之後搵隻(無儲蓄成份)嘅危疾保險做supplement（而家市場好難搵到!）賠償金額大約一年人工，當有咩事可以抖番一年。」

**市場精算師**︰「香港啲危疾廣告賣得好行，啲人對癌症、[心臟病](https://www.bowtie.com.hk/blog/zh/%e5%bf%83%e8%87%9f%e7%97%85/?ref=bowtie.com.hk)、[中風](https://www.bowtie.com.hk/blog/zh/%e4%b8%ad%e9%a2%a8-%e6%b2%bb%e7%99%82%e8%b2%bb%e7%94%a8-%e4%bf%9d%e9%9a%aa%e7%90%86%e8%b3%a0/?ref=bowtie.com.hk)等認知較高，其實最基本嘅係買份住院同手術保險，出院時幫你找數，實報實銷。危疾應該攞嚟supplement，但係好多人都有危疾但係冇買medical，次序搞錯咗。」

**新婚精算師**︰「其實個人儲蓄夠未必需要一份危疾，我自己都未有保險，因為公司同老公嗰份團體醫療都OK。而危疾本身定義喺香港未有統一化，早期原位癌包唔包？ 或者係有無多次賠償？ 所以買嘅時候要非常之小心。」

同佢哋傾完，我發覺個個都好踴躍發表意見，但係整體上個message都幾一致。

一句講晒， 10個有9個都會先買份醫療保險做top-up，大公司雖然有保障，但都係有份基本兼且「高墊底費」嘅medical傍身好啲。另外，亦應該趁後生同健康時買咗先，危疾保險同有投資成份嘅保險就有餘錢先買啦。

Disclaimer: 雖然個個講到好似好專業，但有幾個都因為嫌麻煩未買。而家上網10分鐘就買到，唔該一人買一張！

**延伸閱讀**

- [【幾時買保險好？】精算師及保險專家話你知畢業、結婚、退休前應買什麼保險！](https://www.bowtie.com.hk/blog/zh/%e8%b2%b7%e4%bf%9d%e9%9a%aa-%e6%8a%95%e4%bf%9d-%e7%95%a2%e6%a5%ad-%e7%b5%90%e5%a9%9a-%e9%80%80%e4%bc%91/?ref=bowtie.com.hk)
- [公立醫院爆煲？3 個趁早買份自願醫保的理由！](https://www.bowtie.com.hk/blog/zh/%e5%85%ac%e7%ab%8b%e9%86%ab%e9%99%a2%e7%88%86%e7%85%b2-%e8%b6%81%e6%97%a9%e8%b2%b7%e4%bb%bd%e8%87%aa%e9%a1%98%e9%86%ab%e4%bf%9d%e7%9a%84%e7%90%86%e7%94%b1/?ref=bowtie.com.hk)
- [自願醫保 VS 傳統醫保](https://www.bowtie.com.hk/blog/zh/learn/%e8%87%aa%e9%a1%98%e9%86%ab%e4%bf%9d-%e9%86%ab%e7%99%82%e4%bf%9d%e9%9a%aa/?ref=bowtie.com.hk)
- [轉自願醫保的須知](https://www.bowtie.com.hk/blog/zh/learn/%e8%87%aa%e9%a1%98%e9%86%ab%e4%bf%9d-%e8%bd%89%e5%96%ae/?ref=bowtie.com.hk)

本文章內容由 Bowtie 團隊 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。此文章內任何與 Bowtie 產品相關的內容僅供參考及作教育用途，客戶應參閱相關產品網頁內詳細之條款及細則。