> ## Content Index
> Fetch the complete content index at: https://www.bowtie.com.hk/learn/llms.txt
> Use this file to discover other available public pages before exploring further.

# 【茶餐廳】食晏唔想肥？睇吓營養師5大健康午餐之選！
- URL: https://www.bowtie.com.hk/learn/茶餐廳-食晏唔想肥-睇吓營養師健康午餐之選/
- Published: 2019-05-30T06:11:33.000Z
- Updated: 2026-11-06T08:01:59.000Z
- Description: 香港人鍾意去茶餐廳食午餐，入面啲選擇真係……成個餐牌有一半以上嘅嘢食都係多油、無蔬菜，高卡路里、唔夠均衡，真係想減到肥都好難。今次就等MasterJack教大家點樣喺 茶餐廳 入面食得健康啦！
- Author: MasterJack
- Tags: 營養貼士

香港人要減肥，其中一個幾大嘅阻滯，莫過於晏晝成日要出街食午餐，食埋啲個碟入面有成10茶匙油（你無睇錯，係10茶匙，即係400幾Kcal呀！）嘅嘢，真係唔使旨意會減到肥，唔再增磅都已經偷笑。由其係香港人鍾意去茶餐廳，入面啲選擇真係……成個餐牌有一半以上嘅嘢食都咁多油，又無蔬菜，真係好高卡路里，亦都唔夠均衡。今次Bowtie就搵嚟MasterJack教大家點樣喺茶餐廳入面食得健康！

## 茶餐廳揀飲擇食5大策略

喺茶餐廳食飯，我會俾大家5個策略：

1. 飯餸要分開 – 咁先可以避免食到過多嘅汁醬。
2. 均衡少少，有菜有肉 – 食唔夠纖維，又點減得成肥呀？
3. 湯粉麵多數比較理想 – 至少唔會食到汁醬，同埋過多嘅油！
4. 喺碟飯／麵上面賺到嘅卡路里， 千祈唔好輸返喺杯飲品度 – 飲品一定要揀無脂同低糖嘅。
5. 無謂睇卡路里 – 就算我下面寫俾你睇都好啦 （編輯要求），其實都未必係你真實食落肚嘅數字嚟。每間餐廳、每個廚師嘅手勢都唔同，所以我都係俾個大約數字大家參考吓㗎咋。揀嘢食最實際都係睇佢夠唔夠均衡，高唔高油份。

**延伸閱讀**

- [【營養師做啲咩？】了解政府醫院營養師的日常！](https://www.bowtie.com.hk/blog/zh/%e7%87%9f%e9%a4%8a%e5%b8%ab-%e6%94%bf%e5%ba%9c%e9%86%ab%e9%99%a2/?ref=bowtie.com.hk)

## 想減肥喺茶餐廳食咩好？

**1\. 番茄炒蛋飯**

呢個飯我個人大力推介，好味又唔肥，酸酸甜甜又開胃。材料上算係均衡，有蔬菜，又有蛋白質（依碟飯嘅蛋白質來自雞蛋，係一樣低脂嘅蛋白質食材）。只要落單時，講聲要飯餸分開上，或者餸放側面，咁就可以避開啲高糖嘅汁醬。

**熱量參考：**500-700Kcal，25-30g 蛋白質（假設有3隻蛋）

**2\. 時菜肉片飯**

呢個飯係另一款比較均衡嘅推介，都係有菜有肉。比起其他肉類，肉片唔使沾粉「走油」（即係預先用油炸熟。基本上，茶餐廳嘅大部份肉類，例如豬肉、豬扒、雞球、魚塊、斑塊等都會咁整），所以少好多油份㗎！

**熱量參考：**500-700Kcal，30g 蛋白質

**3\. 西芹雞柳飯**

呢個選擇係碟頭飯入面，稱得上係最低脂嗰碟啦。雞柳係低脂部位，西芹直頭無脂肪咁濟，鐘意食西芹嘅朋友必定要揀！

**熱量參考：**400-600Kcal，25-30g 蛋白質

**4\. 海南雞／白切雞配白飯同菜**

呢兩款其實都係相似嘅菜式，只要乖乖地唔食雞皮，都算係低脂嘅。如果可以指定要雞胸，就當然更加好啦。

**熱量參考：**600-700Kcal，30-35g蛋白質

**5\. 雲吞麵配菜心／芥蘭（走油）**

低脂之選肯定係佢！雲吞入面嘅蝦肉係低脂嘅蛋白質，菜心同芥蘭都係高纖維嘅蔬菜。相比之下，生菜纖維就低得多啦，通菜唔加腐乳又唔好食，加左就又咸又肥……

**熱量參考：**300-400Kcal，20-35g 蛋白質（視乎有幾多粒雲吞）

## 想減肥喺茶餐廳飲咩好？

跟住到飲品啦。其實好簡單，唔好揀有糖、蜜糖、花奶、煉奶嘅飲品就得啦！ 都仲有好多款可以揀：熱檸水、熱檸茶、齋啡、無糖豆漿、薏米水都係好選擇！以無糖豆漿為例，一杯先得60Kcal，加左糖嘅就要睇幾重手啦，起碼都有150Kcal。

**延伸閱讀**

- [【減肥餐單】制定 Keep Fit 計劃前 營養師幫你糾正 6 大致肥誤解！](https://www.bowtie.com.hk/blog/zh/%e6%b8%9b%e8%82%a5-%e8%a8%88%e5%8a%83%e5%89%8d-%e7%87%9f%e9%a4%8a%e5%b8%ab-%e7%b3%be%e6%ad%a3-%e8%87%b4%e8%82%a5-%e8%aa%a4%e8%a7%a3/?ref=bowtie.com.hk)
- [【卡路里】減肥淨係睇熱量？營養師教你 5 大健康飲食秘技！](https://www.bowtie.com.hk/blog/zh/%e5%8d%a1%e8%b7%af%e9%87%8c-%e6%b8%9b%e8%82%a5-%e6%b7%a8%e4%bf%82%e7%9d%87-%e7%86%b1%e9%87%8f-%e7%87%9f%e9%a4%8a%e5%b8%ab-%e5%81%a5%e5%ba%b7%e9%a3%b2%e9%a3%9f/?ref=bowtie.com.hk)
- [【早餐推介】營養師精選 5 大健康早餐食譜！](https://www.bowtie.com.hk/blog/zh/%e6%97%a9%e9%a4%90%e6%8e%a8%e4%bb%8b-%e5%94%94%e9%a3%9f%e6%97%a9%e9%a4%90%e4%bb%b2%e8%82%a5-%e7%87%9f%e9%a4%8a%e5%b8%ab-%e7%b2%be%e9%81%b8%e6%97%a9%e9%a4%90%e9%a3%9f%e8%ad%9c/?ref=bowtie.com.hk)
- [什麼是生酮飲食法？能否長期減肥？營養師同你分析利弊！](https://www.bowtie.com.hk/blog/zh/%e7%94%9f%e9%85%ae%e9%a3%b2%e9%a3%9f/?ref=bowtie.com.hk)

這篇文章有用嗎？ 9 1

本文章內容由 MasterJack 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。此文章內任何與 Bowtie 產品相關的內容僅供參考及作教育用途，客戶應參閱相關產品網頁內詳細之條款及細則。