親子資訊
親子資訊 7個準則搵補習老師，第6點尤其重要！
私人補習文化盛行，好多家長都急喺新學年為幫子女搵補習老師。但部分家長都覺得好難確保私補老師嘅質素，老師嘅學歷背景同教學能力未必成正比。搵一個好嘅導師真係唔易。今次Bowtie請左Tutor Circle尋補同大家歸納左幾個補習老師應該有嘅7個特質。
1.補習老師要成績優異，唔係補黎做咩？
要識得教人，當然係自己嘅成績方面都要有返咁上下實力先得啦。教高中嘅話最好緊係要個科攞星，教初中或小學嘅話起碼都要合格，識啲基本野。如果導師自己都讀唔掂，仲邊到有資格教人呢 ? 相信呢一點大家都知，所以呢一點只係一個基本門檻，有唔代表佢係一個好老師，但冇嘅話都幾難係一個好老師。
2.概念可以好複雜，老師識清楚解釋概念好重要！
可以清晰講解到唔同複雜嘅概念，並且令學生明白係一件非常高深嘅學問。呢一點非常重要，好多時候我地會有個錯覺，以為只要老師成績夠勁，就一定教得好。但事實並非如此，識讀唔代表識教！讀得好，係代表老師有好嘅理解能力，但教得好，係講求傳送訊息同教人嘅能力，兩樣野係唔同架。要教得好，一定要識得將複雜嘅概念簡化，深入淺出，令到完全唔識嘅學生都聽得明成件事，靠組織同歸納幫助學生理解，而唔係幫老師自己理解，大家真係要留意呢一點。
3.老師有冇耐性會影響教學深度
補習老師需要有一定耐性，尤其是對住定力唔夠嘅小學生。每個學生理解事物同埋知識嘅方法，仲有吸收速度都有所不同，老師有時解釋左一兩次都未必有辦法幫到學生理解成件事，因為大家嘅知識本身水平就有差異，要逐步幫學生由完全唔識到理解，有時係需要碼斷重複同犯錯，老師如果缺乏耐性，覺得學生唔掂，但又唔搵方法教到學生明白，咁呢個真係唔算一個好好嘅補習老師。
4.老師最緊要了解個別學生需要
私補最有優勢嘅地方就係個人化。導師透過一對一或者小班教學，可以清楚了解學生需要 同 問題所在，然後locate resources 作針對性改善。所以好嘅私補老師一定會時時刻刻留意學生係咩位卡住，有咩位唔係好掌握到，分析返要點樣進步，做啲咩練習，呢點就係點解好多人會選擇搵私補嘅原因。
5.老師要識有效同學生溝通
良好溝通可以有助導師了解學生需要，因才施教。唔同上面嘅解釋概念，呢到嘅溝通技巧係講點樣同學生進行有效溝通，了解佢嘅興趣、學習需要、心情、性格、習慣 等等，咁就可以更加了解個學生。例如學生本身有欠自律，老師就要用強硬少少嘅態度去安排功課，學生本身比較有紀律，就可以減少堂上去做practice嘅時間，集中教一啲新野，透過溝通了解學生多一點，教學嘅效率都會高一啲。
6.最簡單但最難做到，有責任心、準時係基本野！
無論有幾咁豐富嘅知識都好，如果導師連一個人嘅基本操守同品格都唔好嘅時候，就唔應該用。
呢一點好重要，冇責任嘅老師常可能會甩底、冇準備、遲到、失蹤等等，呢啲行為嚴重影響左學生嘅學習進度，遇到呢啲情況一定唔可以長補。對住冇責任嘅老師一定唔可以心軟，快啲換一個啦！一個冇責任心嘅老師係唔值得你花時間同金錢係佢身上㗎！
7.導師有冇做好課堂安排？
同補習老師夾好時間，唔好成日轉黎轉去，有助加速上課進度。
老師對課堂安排有冇準備都好重要 ! 因為上堂嘅時間已經唔多，如果老師冇安排過要教啲咩，只係被動咁係到等學生提問，有啲咩唔識先問，呢啲只可以叫功課輔導班。好嘅私補老師應該要有事前課堂準備，掌握好每一堂嘅內容同上堂嘅節奏，將最多嘅知識教比學生。
8.總結
人無完美，要搵一個符合晒以上條件嘅導師的確唔容易，但係Tutor Circle尋補有大量導師嘅真實評語，根據用戶評分幫你揀到一位最合你心意嘅導師，咁就唔洗上完第一堂先知個導師有咩致命嘅缺點啦！
【私人補習價錢】最新2020私人補習價錢！
延伸閱讀
這篇文章有用嗎？
1
本文章內容由 Tutor Circle 尋補 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。此文章內任何與 Bowtie 產品相關的內容僅供參考及作教育用途，客戶應參閱相關產品網頁內詳細之條款及細則。
相關文章
