健康生活

【中秋節】邊款月餅無咁肥?營養師教大家點樣選擇健康月餅!

踏入9月又就快到中秋,當然見到唔少月餅廣告,而各大酒樓同餅家都開始賣緊月餅券,為咗唔想大家買錯月餅,中秋之後肚腩圓過月亮,我諗我都係早啲以營養師嘅角度,出手教吓大家揀月餅啦!今時今日月餅有好多種,花多眼亂,而且仲越嚟越吸引,真係好難忍㗎。其實唔使忍,所謂「少食多滋味」,過時過節食少少我覺得無咩問題,不過揀嘅時候如果可以揸緊宗旨,就算食咗月餅都唔需要太內疚。 
作者 MasterJack
日期 2019-06-25
更新 2021-09-15
目錄
月餅卡路里/脂肪大比拼選擇月餅時留意營養標籤最緊要都係睇有幾多脂肪糖尿病人可以食咩月餅?

月餅卡路里/脂肪大比拼

月餅卡路里(Kcal/個)脂肪(g/個)
雙黃白蓮蓉月餅80040
芒果味冰皮月餅2609
朱古力味冰皮月餅32013
五仁月餅35013
  • ︰以上營養資料只供參考,不同品牌或有分別

首先,大方向係多數冰皮月餅都會比傳統月餅低卡路里,同埋無咁高脂肪,平時一個傳統大細(180g)嘅雙黃白蓮蓉月餅含大約800Kcal / 40g 脂肪,而一個芒果味嘅冰皮月餅(100g)含大約260Kcal / 9g 脂肪,朱古力味大約有320Kcal / 13g 脂肪,你就算乘返同等大細,都一定係冰皮低卡低脂好多。

我對五仁月餅嘅態度中立,健康程度方面,佢又唔係特別好,但又唔係特別衰,好唔好食,就個人口味各有不同啦。不過因為多果仁,所以脂肪都唔少,一個月餅大約含350Kcal /  13g 脂肪(雖然脂肪唔太低,但係好彩果仁嘅飽和脂肪多數都較低,所以壞膽固醇唔會升得太高。)

至於雪糕月餅,其實就即係雪糕,你就當用咗平時食雪糕嘅quota 去食囉。

選擇月餅時留意營養標籤

講咁多都無用,因為市場上有N咁多款月餅,我點會知道晒佢哋嘅卡路里同脂肪呀,所以最緊要識睇食物營養標籤。

每個標籤會顯示卡路里、蛋白質、總脂肪(下面仲會有飽和脂肪同反式脂肪)、碳水化合物(另會顯示埋糖份)同鈉(即係鹽呀),同埋最緊要嘅係留意︰成個標籤係用「每食用份量」抑或「每100g/ml」 計算。

通常比較「肥」嘅食物都唔會用「每100g」去計架喇,計出嚟條數咁大會嚇親人㗎嘛,好似冰皮月餅咁100g 會切4份,再用「每1/4個25g」 嚟計算個標籤。同樣例子包括薯片,個標籤都係用「每幾塊」嚟計算!

Bowtie & JP Health 營養師服務

最緊要都係睇有幾多脂肪

另外,我都係貫徹宗旨,我唔最著緊卡路里,最緊要始終係每個月餅有幾多脂肪,同埋當中幾多係飽和脂肪同反式脂肪。我一路都話脂肪嘅吸收率係近乎100%,食幾多吸幾多,吸收完身體又唔願拎出嚟用,咁就好易肥!

而飽和脂肪同反式脂肪更加會升高血液入面嘅低密度脂蛋白—膽固醇(統稱:壞膽固醇),跟手就會增加血管栓塞嘅風險。同埋,我哋會睇埋 總脂肪:飽和脂肪+反式脂肪 嘅比例。總之,如果喺呢堆脂肪入面,有好多都係壞脂肪,咁就唔值得買啦。之不過,其實食咗幾多落肚最實際,所以總飽和脂肪+反式脂肪呢個數都好緊要。

仲有記得盡量唔好買有棕櫚油成份嘅月餅(其實乜食物都係啦),呢啲油雖然平,但就好高飽和脂肪,絕對係植物油界嘅「豬油」,好唔健康。(細細聲講︰大佬,幾百蚊買盒月餅,但係餅家仲俾棕櫚油你,過唔過份呀……)

糖尿病人可以食咩月餅?

至於有糖尿病嘅朋友就應該選擇低糖月餅,佢哋唔止要睇脂肪,仲要睇 1.總糖量 2.碳水化合物:糖 嘅比例,因為總糖量關升幾多血糖事,碳水化合物:糖 就關升幾快事。低糖月餅成份係代糖,雖然同普通雙黃白蓮蓉一樣咁多卡路里,但糖份近乎零,咁血糖就冇升得咁快喇。低糖月餅仲會有句提示(見下圖),幾窩心。

有腎病嘅朋友,如果你嘅鉀同磷都偏高,可能就唔適合食五仁月餅,同埋啲好多豆同好多水果喺入面嘅月餅。順便提提你,腎病病人千祈唔好食楊桃呀!(註︰楊桃入面含有神經毒素—草酸oxalic acid,對正常人無害,但對腎功能受損,即過濾排廢功能下降嘅人士,係會引致中毒同生命危險㗎。)[1]

雖然各大商家仲賣緊月餅,唔知仲有無新款出爐,但到6月尾為止,我淨係見到一個大型餅家有喺自己網頁上面大大方方顯示自己每款月餅嘅營養數值。我唔係話佢啲月餅係最好味,不過呢點係抵讚嘅,They earned my respect!

資料來源
  • 1Chang J, Hwang S, Kuo H, Tsai J, Guh J, Chen H et al. Fatal outcome after ingestion of star fruit (Averrhoa carambola) in uremic patients. American Journal of Kidney Diseases. 2000;35(2):189-193.
分享
這篇文章有用嗎?
2
0
本文章內容由 MasterJack 提供並只供參考,不代表 Bowtie 立場,Bowtie 對任何人因使用或誤用任何信息或內容,或對其依賴而造成的任何損失或損害,不承擔任何責任。此文章內任何與 Bowtie 產品相關的內容僅供參考及作教育用途,客戶應參閱相關產品網頁內詳細之條款及細則。
Bowtie Pink 自願醫保

相關文章

【維他命B雜即係咩?】了解維生素功用、食物來源及缺乏症狀! 【維他命B雜即係咩?】了解維生素功用、食物來源及缺乏症狀!
健康生活

【維他命B雜即係咩?】了解維生素功用、食物來源及缺乏症狀!

如何清除牙石?牙膏有效嗎?專業牙醫話你知! 如何清除牙石?牙膏有效嗎?專業牙醫話你知!
健康生活

如何清除牙石?牙膏有效嗎?專業牙醫話你知!

【抽筋】夜晚小腿抽筋大件事?了解原因及舒緩方法! 【抽筋】夜晚小腿抽筋大件事?了解原因及舒緩方法!
健康生活

【抽筋】夜晚小腿抽筋大件事?了解原因及舒緩方法!

Bowtie 自願醫保靈活計劃於無加價情況下,全級升級,加大保障!
了解升級保障

其他話題

電郵查詢

一般查詢
hello@bowtie.com.hk
傳媒查詢
media@bowtie.com.hk
合作推廣
partner@bowtie.com.hk

© 2022 保泰人壽保險有限公司。版權所有。

我們檢測到您的瀏覽器已經過時。如要得到最佳的瀏覽體驗,請更新或使用其他瀏覽器。 知道了