【癌症飲食】有咩食得？有咩唔食得？註冊營養師逐一解答！

首先，我地今次寫呢篇文嘅前題係︰講求實証醫學，唔做、唔講冇科學研究証實嘅野。外面一講到食物同營養就會講到天花龍鳳，例如可能會建議人跟隨一啲好極端嘅飲食，或者花好多錢去買啲唔知乜野（偏方），有啲甚至睇到都真係得啖笑。

無論你患左邊種癌症，又或者處於治療嘅任何一個階段，你嘅目標都係每日攝取足夠嘅營養，去打呢場仗。任何提倡飢餓或者戒左某類主要營養素嘅飲食療法，都係冇科學根據，而且係會令你缺乏燃料去維持每日嘅消耗，當你再動用身體嘅儲備去彌補，就自然會變瘦、變弱同自身免疫力下降，更難面對之後嘅治療。

每日攝取足夠營養，即係每日都要食夠卡路里同各種微量元素，我哋有時食夠卡路里都會瘦啦，食唔夠更加瘦得仲快。卡路里嘅來源應該要來自澱粉質，蛋白質同脂肪，而且正常情況下，攝取嘅份量（比例）同普通人冇分別，唔需要話邊樣要多啲邊樣要少啲。

另外「有啲人」話癌症病人唔好食雞同唔好食蛋係冇根據嘅，蛋同雞都只係蛋白質，點解唔食得呢？同樣地，你亦都可能聽過受傷唔食得蛋，因為會「發」，但其實受傷更加應該食蛋同雞呢啲優質蛋白質去幫助傷口癒合。

微量元素即係鐵質呀，維他命呀果啲，正常情況下（腸胃運作正常嘅話），進食蔬菜同水果理應可以全面獲得，所以，只要每日食夠蔬果，咁就未必需要維他命丸。

不過正如頭先話齋，每個病人係每個階段嘅飲食需求都唔同。好似有時血癌嘅病人咁，當佢地接受緊化療期間，佢地嘅免疫力會被打到好低，好容易就會受到感染。呢個時候，我哋就需要（係必須）佢地進食一個叫「清潔餐」（Neutropenic diet/Clean diet）嘅飲食，否則，血癌病人就會俾我地覺得好濕碎嘅細菌或者黴菌搞到低嗜中性白血球敗血症（Neutropenic sepsis）。

📝營養小知識🍽

清潔餐就係一種特別嘅飲食方式，去確保你喺醫院外嘅情況下，無論食咩都係「無菌」，令你唔會被食物感染。例如食物都要係新鮮滾熱辣煮好，只可以食無菌環境生產嘅即食食物，就算獨立包裝如餅乾、麵包、即食麵都唔食得（因為當中有好多黴菌，英文︰Mould），水果亦只能食罐頭嘅等等。生肉、煙燻肉、沙律直頭係非常高危。

又或者患上腸癌嘅病人，手術前要「養生」一段時間再入去手術室，增加術後康復率，但係佢地啲腸胃又唔係好work喎，咁就要食易消化同吸收嘅食物喇，而且好多時候都需要飲營養奶，尤其係易吸收嘅水解蛋白配方，如果唔係就好難攝取到每日要嘅卡路里。

嗱，我今次就好概括、好顯淺咁講左癌症病人飲食上有咩要注意，總之飲食係非常非常緊要，以上嘅建議完全唔使傾家蕩產去買一啲「特別食物」，所以話呢，我太老實，都係發唔到達架喇……

下次我會講吓防癌同致癌食物呢兩個Topic。