每年5月,大部分打工仔都會收到稅務局寄嚟嘅「綠色炸彈」– 報稅表,對於Fresh Grad 或者首次報稅嘅人士嚟講,報稅的確係幾複雜,今次就等Bowtie專欄作家赤兔解答一般報稅新手遇到嘅10大常見問題,幫大家慳稅慳時間啦!

2018/19年報稅表已發出

【最新消息】稅務局宣佈已於2019年5月2日發出約268萬份2018/19課稅年度的個別人士報稅表,各位緊記要1個月內(即6月3日或之前)填好報稅表交返稅局;如經網上報稅就可獲自動延期1個月(即限期為7月3日)。如果你已經投保咗自願醫保,報稅時記得申請扣稅呀!

每年報稅交稅時間表

交稅報稅時間表

如果你嘅收入達到某個水平,即係2018年4月1日至2019年3月31日嘅入息高於$132,000,稅局應該已經向你發出咗報稅表,你需要喺1至2個月內交回報稅表。去到10月,稅局就會通知你今年交稅交幾多。

10大報稅常見問題(FAQs)

1.如何報稅?

如果你係一般打工仔,你收到嘅會係「個別人士報稅表(BIR60)」,呢張表係用嚟申報你嘅所有薪俸收入(包括職位年收入、「花紅」、佣金及退休金嘅收入等)、獨資業務嘅利潤、出租全權物業嘅租金,以及申索「免稅額」同「扣稅」項目。

稅局一般會喺每年5月份第1個工作日向納稅人寄出「個別人士報稅表(BIR60)」。收到該表之後,有2個方式報稅︰填實體表報稅及網上報稅。

2.填實體表報稅有什麼要注意?

一路以嚟亦都係最傳統嘅方法當然係人手填表,填好份表再寄返稅局。「個別人士報稅表(BIR60)」入面要填嘅主要係個人資料、報稅期內嘅收入詳情、申索扣稅同免稅額等。

如果填表有疑問或困難,喺打電話或電郵查詢之前,可以先參考稅局提供嘅「個別人士報稅表指南」同埋「個別人士報稅表(BIR60)」樣本。指南同樣本入面都有好多有用嘅指引同提示去幫大家填寫份報稅表。

值得一提,填報稅表係有期限嘅,納稅人須喺報稅表發出日期起嘅1個月內填妥同交回報稅表;而獨資業務東主嘅交表期限就可延長至報稅表發出日期起嘅3個月內。

另外,郵寄報稅表時謹記要貼足郵票,因為稅局係唔會收取郵資不足嘅郵件,郵件退回及重寄需時,分分鐘會搞到meet唔到deadline!

3.網上報稅有什麼好處?「稅務易」eTax

收到報稅表後,如果嫌郵寄交表麻煩,你可以透過「稅務易」(eTax)平台進行網上報稅,既方便、快捷又環保。

透過「稅務易」報稅的確有唔少優點。你可以睇到係咪仲有尚未提交嘅報稅表、尚未清繳嘅稅款、即時估計埋應該要交幾多稅,仲可以經平台更新你喺稅局嘅個人資料紀錄等等。

此外,利用「稅務易」平台嘅報稅期限可以自動延長1個月,即係由報稅表發出日期起嘅2個月內報稅就得啦。

4.如果無收入或者收入低係咪唔使報稅?

唔一定!即使你無收入,或年收入(2018年4月1日至2019年3月31日之收入)低於基本免稅額($132,000)亦即係毋須交稅嘅水平,只要收到報稅表,你都要喺報稅期限內報稅。

5.如果收唔到報稅表係咪代表唔使報稅?

唔係!如果你過去幾年都需要報稅,但今年過咗5、6月仍無收到該課稅年度嘅報稅表,你應該主動以電話或親身聯絡稅局查詢當局係咪已經向你發出報稅表,以索取報稅表複本;而「稅務易」用戶就可以隨時登入該平台查詢係咪有未提交嘅報稅表。

如果你曾經被稅局評定為毋須繳稅,你可能唔會年年都收到報稅表。不過,當你嘅收入重新去到需要課稅嘅水平,你就要主動喺課稅年度結束後4個月內(即7月底前),以書面通知稅局。稅局會發出通知書,覆核你係咪要開始交稅。

6.遲咗報稅會有咩後果?

依時報稅有助稅局準確評稅,以給予你所申索嘅「免稅額」同「扣除」項目。遲交報稅表嘅話,最嚴重會被罰款HK$10,000、繳交額外稅款或被檢控。

除咗面對以上罰則之外,遲交報稅表亦可能會令你交多啲稅。因為稅局收唔到你嘅「免稅額」及「扣除」項目申索,你只會享有「基本免稅額」,稅局會單方面發出估計評稅結果,變相「失去」咗其他減稅(包括其他「免稅額」及「扣除」)嘅機會。

延伸閱讀︰點樣用盡免稅額、扣稅開支,幫你慳到最多稅?

7.夫婦應該各自單獨報稅定係合併報稅著數啲?

無論兩公婆係揀「分開評稅」,定係「合併評稅」,都要各自填好報稅表或者經「稅務易」平台報稅。如果你哋其中一方嘅入息少過佢應該享有嘅「免稅額」,合併評稅理論上會較有著數;但如果你嘅配偶無應課薪俸稅入息,咁你就可以選擇「分開評稅」,兼且獲取「已婚人士免稅額」。

講到尾,唔使擔心交多咗稅,因為如果合併報稅係幫唔到你哋慳稅,稅局嘅評稅主任會向你哋分別發出評稅通知書,幫你哋分開報稅。

8.如果我只有 Freelance收入,或者以現金出糧,仲使唔使報稅?

不論係全職、兼職、散工,銀行過數或者以現金出糧,所有應課稅收入(例如薪金、工資、佣金、津貼同花紅等)都需要如實申報。稅局列明所有薪金、工資及董事酬金都必須課繳薪俸稅。

換句話講,即使你係Freelancer ,只要你嘅收入(2018年4月1日至2019年3月31日)超過基本免稅額($132,000),或者收到稅局寄俾你嘅報稅表,咁都要如實申報所有須課稅收入。

9.報稅時申索免稅額同稅項扣除需要同時交埋證明文件?

唔使!申索免稅額申索扣稅都唔使提供證明文件,但相關嘅文件、收據同紀錄都需要保存6年(由該課稅年度完結起計),以便稅局日後抽查。

10.報稅時可申報自願醫保保費?

無錯!稅務局指出,納稅人或者其配偶喺2019年4月1日起以保單持有人身分為自己或者指明親屬繳付自願醫保保單嘅合資格保費,就可申請扣稅。每名受保人嘅最高保費扣除額係$8,000,可申請扣稅嘅受養人數目不設上限。

納稅人只要將有關資料填返喺2018-19年度嘅報稅表,稅局喺計算該年度薪俸稅暫繳稅時,就會作出考慮。

稅務相關文章︰退稅安排 | 幾時交稅 | 如何用盡免稅額 | 自願醫保扣稅須知

資料來源:香港政府一站通稅務局網頁

Bowtie醫療保險產品

  • 每月保費低至$87
  • 大部份年齡層的保費屬全港最平*
  • 每年保障額高達$42萬
  • 註冊醫護及客服專員為你服務
  • 全網上投保,最快10分鐘完成
  • 限時送$3,000 BowtieCash,助你減輕負擔
  • 每月保費低至$143
  • 保費低過數間大型保險公司的「標準計劃」#
  • 每年保障額高達$60萬
  • 註冊醫護及客服專員為你服務
  • 全網上投保,最快10分鐘完成
  • 限時送$3,000 BowtieCash,助你減輕負擔

什麼是BowtieCash?

Bowtie為幫助客戶填補醫療保險賠償不足的「尾數」缺口,特別設計全港首創的BowtieCash獎賞計劃!按此了解更多

🎉限時優惠

2019年11月30日前,成功投保Bowtie自願醫保,並於付款前輸入優惠碼「BOWTIE」,可獲$3,000 BowtieCash

想收到Bowtie最新嘅保險同健康資訊?

遞交資料表示你已經細閱Bowtie個人資料收集聲明及同意根據此聲明使用和轉讓你的個人資料,包括使用和提供你的個人資料,以作推廣。你可以隨時致電Bowtie 客戶服務熱線3008-8123,聯絡客服專員以更新你接收Bowtie市場推廣訊息的選項。

作者簡介︰

赤兔曾任職傳媒,現以筆耕為生,喜愛旅遊及健康生活,閒時亦有鑽研理財知識,希望透過實用文章令大家活得更精明。

*本文章內容由赤兔提供並只供參考,不代表Bowtie立場,Bowtie對任何人因使用或誤用任何信息或內容,或對其依賴而造成的任何損失或損害,不承擔任何責任,如需要任何稅務建議,請諮詢你的稅務顧問。

FacebookWhatsAppWeChat