根據食物及衞生局網站，自願醫保計劃（Voluntary Health Insurance Scheme 簡稱 VHIS）其中一個賣點就係保費支出可成為「扣除」額，降低你嘅應課稅入息，變相達到扣稅效果。
最近，保險比較平台imSure做咗個調查，發現逾81%受訪者對自願醫保稅務安排有誤解。想知呢個醫保計劃可以幫你慳到幾多稅？報稅前，你要留意以下7個重點︰
1.點計自願醫保扣稅額？
2018-19年度財政預算案公佈，每名受保人每年可用作扣稅嘅自願醫保保費「扣除」額為$8,000，有關扣稅安排已經立法會通過。
扣稅額嘅估算方式其實好簡單︰
自願醫保保費 X 稅率 = 扣稅額
如果你嘅保費支出係$5,000，稅率係2%，可獲扣稅金額就係$100﹔如果你嘅收入達到最高稅率17%，可獲扣稅金額就係$850。
交幾多稅就要睇埋免稅額
薪俸稅計算公式︰個人應課稅 = （入息總額 – 「扣除」額 – 免稅額） X 稅率
用最簡單嘅例子解釋，假設你嘅年收入係$18萬，只有個人免稅額（$13.2萬^）及自願醫保「扣除」額（$5,000），喺2019/20年課稅年度，你就要交咁多稅喇︰
（$180,000 – $5,000 – 132,000）X 2% = $860
^假設2019/20年課稅年度個人免稅額為$13.2萬。
香港首間純網上保險公司Bowtie 現已推出自願醫保–靈活計劃，月費最平唔使$200*，8月1日至31日（包括首尾兩日）在投保時輸入優惠碼 「BOWTIE」 並成功投保，可享1個月保費減免# 兼享 $2,000 BowtieCash^，即用Bowtie保費計算機進行初步報價！
註︰以上計算的保費僅供參考，你實際需要繳交的保費受時間、通脹、核保等因素影響，並需加上保險業監管局徵收的保費徵費，請下載並查閱標準保費表 (標準 / 靈活「基本」 / 靈活「升級」)
*以25歲非吸煙男性靈活計劃為例，每月保費為$183。
#於推廣期內成功投保，可於保單生效後第四個月享有免保費優惠。
^BowtieCash獎賞計劃 – 助你索償時，支付任何超過保泰自願醫保計劃賠償額的合資格醫療費用，須受有關條款約束。詳情請參閱推廣活動細則。
2.如何申請自願醫保扣稅？
根據稅務局網頁，如果你於2019/20課稅年度內，已繳付/可能繳付合資格自願醫保計劃保單保費，你可以將有關資料填寫於2018/19課稅年度個別人士報稅表第8部；稅務局喺計算2019/20暫繳稅時會作出考慮。
如果透過稅務易（eTAX）平台網上報稅，喺確認個人資料後，去到「選擇報稅表各部」，記得剔返「根據自願醫保計劃保單繳付的合資格保費」嗰格（紅圈）。
（稅務易 eTAX 截圖）
填寫完入息等資料之後，就會嚟到「根據自願醫保計劃保單繳付的合資格保費」呢版，如果係為自己投保，只要簡單填返第（1）項嘅「為本人繳付的合資格保費」（紅圈）就得啦。
如果係為親屬支付保費的話，就填返第（2）項嘅「為指明親屬繳付的合資格保費」之所需資料同保費（藍圈）。
（稅務易 eTAX 截圖）
就算唔記得喺今年5月收到嘅報稅表內提出，你亦可喺收到繳稅通知書後填寫IR1121表格申請緩繳2019/20暫繳稅。順帶一提，2019年遞交報稅表期限為6月3日，但如果選用電子報稅就可以延至7月3日或之前提交。
3.有咩證明文件需要Keep 住？
喺申請扣稅果陣，你係唔需要提交自願醫保相關證明文件，但你就需要保留保費收據及年度保單結單6年（由有關課稅年度完結起計），準備定俾稅務局隨時查核。
4.留意邊個係合資格「受養人」
稅務條例草案定明，只有合資格「受養人」嘅保費支出先有得扣稅，所以你要了解清楚「受養人」定義，當中包括︰
- 納稅人之配偶及子女
- 納稅人之父母、祖父母、外祖父母及兄弟姊妹
- 配偶之父母、祖父母、外祖父母及兄弟姊妹
幫年紀較大嘅「受養人」買自願醫保，會有較大機會用盡「扣除」額。因為保險公司於核保時，會參考其年齡來評估保費，年紀較大人士嘅保費通常較貴，「扣除」額自然較高。
換言之，如果你有兄弟姊妹，就要同佢哋夾清楚邊個負責幫父母買自願醫保、邊個可以申報有關「扣除」額，到時爭住報就唔好啦。
5.幫埋屋企人買慳最多稅
保費價錢方面，根據傳媒報道，食物及衞生局於2019年3月29日公布，自願醫保「標準計劃」產品嘅整體平均保費為$4,000，對比2017推算的$4,800平20％。
| 年齡 | 每年平均保費 |
| 0至4歲 | $2,600 |
| 20至24歲 | $2,000 |
| 40至44歲 | $3,900 |
| 60至64歲 | $9,800 |
資料來源︰明報
淨係幫自己買自願醫保，好明顯唔會用得盡「扣除」額。
如果你想慳多啲稅嘅話，你可以幫「受養人」買埋自願醫保，因為根據《 2018 年稅務(修訂)(第4 號)條例. 草案》，每名受養人嘅保費支出都可以扣稅，而且人數不設上限，假設你幫自己同3名「受養人」（共4人）買自願醫保，「扣除」額上限最多可以變成$8000 X 4 = $32,000。
假設陳先生夫婦（同樣係40歲）一家8口，需要供養雙方60歲以上父母及一對約20歲嘅子女，家庭年度總收入為$960,000。根據稅務局資料，已婚人士免稅額為$264,000，每名子女免稅額為$120,000，供養每名父或母嘅免稅額為$50,000。
例子1︰全家都冇買自願醫保*
應課稅入息︰$960,000 – $264,000 – $120,000 X 2 – $50,000 X 4 = $256,000
首20萬入息稅款︰$16,000
餘下稅款︰ $56,000 X 17% = $9,520
例子2︰陳先生只幫自己買自願醫保*
自願醫保「扣除」額︰$3,900（根據上表平均保費）
應課稅入息︰$960,000 – $264,000 – $120,000 X 2 – $50,000 X 4 – $3,900 = $252,100
首20萬入息稅款︰$16,000
餘下稅款︰ $52,100 X 17% = $8,857
例子3︰陳先生幫一家8口買自願醫保*
自願醫保「扣除」額︰$3,900 X 2 + $2,000 X 2 + $9,800 X 4 = $51,000（根據上表平均保費）
應課稅入息︰$960,000 – $264,000 – $120,000 X 2 – $50,000 X 4 – $51,000 = $205,000
首20萬入息稅款︰$16,000
餘下稅款︰ $5,000 X 17% = $850
| 例子 | 冇買自願醫保 | 只幫自己買自願醫保 | 幫一家8口買自願醫保 |
| 交稅 | $25,520 | $24,857 | $16,850 |
| 慳稅 | $0 | $663 | $8,670 |
可見，陳先生如果幫埋屋企人買自願醫保，總共可以慳稅超過 $8,600 ，換個角度即係以83折買自願醫保。
*以上例子沒有計算個人進修問支、長者住宿照顧開支、居所貸款利息、強積金供款、認可慈善捐款的「扣除」額。
延伸閱讀︰【報稅2019】點樣用盡免稅額、扣稅開支，幫你慳到最多稅？
延伸閱讀︰【報稅交稅2019】畢業生/打工仔新手必讀9大常見問題！
6.只有食衞局認可產品先有得扣稅
自願醫保計劃已於4月1日推出市場，保險公司需要列明邊隻產品係計劃下嘅認可產品，而認可產品又分為最基本嘅「標準計劃」及保險公司自行設計嘅「靈活計劃」，暫時只有呢兩類產品先有得扣稅。
保險公司可能會將「靈活計劃」夾埋其他保險產品當一個Package Sell俾你，但你只可以就「靈活計劃」的支出申請扣稅，例子如下表︰
| 保險產品 | 「扣除」額 |
| 「標準計劃」（每年保費$3,000） | $3,000 |
| 「靈活計劃」（每年保費$9,000） | $8,000（已達上限） |
| 「靈活計劃」+家居保險 （每年保費 $7,000+$1,000） |
$7,000 |
由於家居保險並非食衞局認可產品，相關保費支出就唔可以當係合資格稅務「扣除」項目喇！
7.「保費寬限期」會影響扣到幾多稅
大部分保險公司都會提供30日「保費寬限期」，如果投保人冇交一個月保費，只要喺寬限期之內交返保費，張單仍然會生效。
眾所周知，課稅年度最後一日係3月31日，假設你喺過去11個月都有交保費，只係3月暫時斷供，4月中先供返，即使你交晒3月同4月嘅保費，你只可以就11個月嘅保費支出扣稅，4月嘅支出就應該計落下一年度。
假設每月保費為$200，可扣稅之保費支出（3月斷供）= 200 X 11 = $2,200
如果對於年度保費支出同「扣除」額有疑問，最好就搵保險公司出張顯示你年度保費支出嘅「證明書」，跟住張證明去報稅就最穩陣喇！
最後，Bowtie 資訊團隊提返大家，自願醫保原意係保障你嘅突發醫療開支，除咗考慮扣到幾多稅，最好睇埋啲保障適唔適合自己，先至作出投保決定。
延伸閱讀︰【自願醫保計劃】VHIS產品保障、保費、扣稅、轉保全攻略！
*本文章內容由Bowtie資訊團隊提供並只供參考，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任，如需要任何稅務建議，請諮詢你的稅務顧問。
