疾病症狀

【麻疹】病徵、疫苗、香港疫情、傳染途徑、預防方法話你知!

近日香港嘅麻疹(英文:Measles)疫情持續,令唔少朋友都擔心中招,更有本地確診患者係喺潛伏期期間去過日本,搞到唔少港人驚「返鄉下」都會感染。究竟麻疹有咩病徵?傳染途徑係點?點樣預防?係咪要去打疫苗先至可以放心?打嘅話又應該打幾多針呢?今次Bowtie 醫療資訊團隊一次過幫你話你知,等你唔使估估下,唔使心慌慌:
日期 2019-12-01
更新 2020-09-07
目錄
香港最新疫情什麼是麻疹?麻疹有咩病徵?麻疹有咩併發症?嚴重嘅話會死?麻疹係點樣傳染嘅呢?點樣預防麻疹?係咪要打麻疹疫苗?麻疹疫苗價錢

香港最新疫情

根據衞生署衞生防護中心嘅數字,截至2019年6月21日,該中心喺今年一共錄得81宗麻疹個案,患者年齡介乎8個月至49歲。81宗個案入面,有29個患者都係機場/ 航空公司嘅人員,部份發病前曾到訪菲律賓、內地及台灣等地區。此外,當中有2名係醫護人員,有6名係喺尖沙咀同一店舖內工作嘅職員。

什麼是麻疹?麻疹有咩病徵?

當全城都談論緊麻疹,你又知唔知麻疹係一種點樣嘅疾病呢?衞生防護中心指出,麻疹係一種由麻疹過濾性病毒而引起嘅高傳染性疾病,因此唔可以用抗生素直接醫治,但可以處方其他藥物去紓緩病徵。麻疹嘅潛伏期一般約7至18日,甚至長達21日。

麻疹患者係感染初期一般會發燒、咳、流鼻水、眼紅同埋口腔內出現白點。去到3至7日後,患者皮膚會出現污斑紅疹,通常會由面部擴散到去全身,大約維持4至7日,甚至長達3個星期,患者皮膚仲會留有褐色嘅斑痕,或者有甩皮嘅情況。

麻疹(污斑紅疹)

麻疹有咩併發症?嚴重嘅話會死?

衞生防護中心話,麻疹病情嚴重嘅話,患者嘅呼吸系統、消化系統同腦部都有可能受影響,最嚴重嘅後果可以係死亡呀!究竟中咗麻疹係咪真係咁危險呢?

美國疾病控制及預防中心嘅資料顯示,大約30%嘅麻疹個案都會出現一種或以上嘅併發症,而5歲以下嘅小朋友同20歲或以上嘅年齡層出現併發症嘅情況係較為普遍。

麻疹常見的併發症^

併發症 出現機會率 (%)
腹瀉 8%
中耳炎 7%
肺炎 6%
腦炎 0.1%
癲癇 0.6-0.7%
死亡 0.2%
  • ^美國疾病控制及預防中心1985-1992年期間的數據

由以上數字睇到,麻疹聽落雖然得人驚,但對一般健康嘅人嚟講,出現嚴重併發症或者死亡嘅風險唔算好高,所以大家唔使過份擔憂。不過,小朋友同孕婦就要特別小心!

麻疹對BB同小朋友嚟講係特別危險。根據美國疾病控制及預防中心嘅資料,喺2001至2013年期間,5歲以下而曾經感染麻疹嘅小朋友當中,有28%需要入院治療。嚴重嘅個案中,感染麻疹甚至會令小朋友出現併發症,例如肺炎,或者造成永久性腦部或聽力損害。

傳媒報道引述專家指出,孕婦感染麻疹嘅死亡率會較高,容易出現肺炎或者病毒上腦嘅情況。

衞生防護中心亦有提到,孕婦係唔適合接種麻疹疫苗嘅,而女性懷孕時如果感染麻疹,可能會導致流產、早產同BB出世時過輕等情況,但就無證據顯示會增加BB先天性缺陷嘅風險。

另外,如果孕婦喺生BB前後嘅短時間內感染麻疹,佢嘅初生BB都受感染嘅話,就會有較高嘅死亡同埋出現亞急性硬化性全腦炎(SSPE)嘅風險。所以各位準媽媽要加倍小心呀!

新冠肺炎保險

麻疹係點樣傳染嘅呢?

麻疹肆虐,大家當然都唔想中招,咁你就一定要知道麻疹究竟係經咩途徑傳染㗎啦。根據衞生防護中心資料,麻疹可以經由空氣中嘅飛沫,或者係透過直接接觸患者嘅鼻喉分泌物而傳播,但透過被鼻喉分泌物整污糟嘅物件而傳播嘅機會就比較低。

要注意嘅係,麻疹患者係出疹之前4日,至到出疹之後4日內,都可以將病毒傳播開去,所以如果自己或者身邊有親人、朋友、同事出現發燒,或者一啲上呼吸道感染嘅病徵,都唔好掉以輕心。唔舒服就唔應該返工、返學,避免傳播疾病。

點樣預防麻疹?

要預防麻疹衞生防護中心叫大家留意以下7招!

  1. 疫苗係最有效預防麻疹嘅方法。現時本港嘅小朋友會分別喺1歲同小一嘅時候接種麻疹、流行性腮腺炎同德國麻疹嘅混合疫苗(MMR混合疫苗)
  2. 注意個人及環境衞生
  3. 保持室內空氣流通
  4. 保持雙手清潔,並以正確方法洗手
  5. 打乞嚏或者咳嘅時候要用紙巾掩住鼻,用過嘅紙巾要掉喺有蓋嘅垃圾筒,然後徹底洗手
  6. 徹底清潔小朋友玩過嘅玩具同屋企嘅傢俬
  7. 出現麻疹病徵或有懷疑,應盡快求醫

除咗以上7招,準備旅行或者公幹嘅朋友都要小心!衞生署公佈,因為日本、菲律賓、澳洲、紐西蘭同美國部份地區依家正出現緊麻疹疫情。

如果情況許可,當然暫時唔好去呢啲地區,盡量減低感染風險;如果必須起程,大家都要注意個人衞生,係公眾地方盡量戴住口罩,加強保護。

如果喺麻疹疫區回港之後,出現疑似麻疹嘅病徵,就應該要即刻去睇醫生,亦都唔好接觸對麻疹未必有免疫力嘅人,例如係孕婦同小朋友。

係咪要打麻疹疫苗?

頭先都提過,疫苗係最有效預防麻疹嘅方法。健康嘅人士打咗疫苗之後一般可以獲得長期,甚至係終生嘅保護。

喺香港,目前有個計劃叫做「香港兒童免疫接種計劃」,係為1歲嘅小朋友喺母嬰健康院接種第1劑MMR混合疫苗,呢針預防麻疹嘅效果可以去到93%。

之後,小朋友會喺小學1年班嘅時候接種第2劑MMR混合疫苗,2針加埋嘅預防效果可以提升至97%。97%呢個數字係表示,喺100個打咗2劑MMR混合疫苗嘅人當中,有97個人可以終生對麻疹免疫。

對於小朋友係咪需要喺小一之前提早接種第2劑疫苗,呢樣嘢應該先諮詢家庭醫生嘅意見;而未夠1歲嘅BB就要特別小心,因為佢哋未打任何疫苗,對麻疹無免疫力,所以就唔應該去啲最近有麻疹爆發嘅地方。

現行「香港兒童免疫接種計劃」嘅受眾只係1967年或之後出世嘅人士,而且接種疫苗嘅種類亦都因時間而有所分別,大家最好都係參考返自己嘅「針卡」(免疫接種記錄),或者考慮吓需唔需再要接種疫苗。

衞生署所講,部份小朋友喺注射疫苗後5至12日內,可能會發燒,但通常會喺2至5日內就會自動退燒,建議家長可以俾小朋友食退燒藥。小部份人接種疫苗之後1至2星期會出紅疹, 但會喺1至2日後自動消失。

極少數嘅人打針後可能出現短暫性嘅腮腺腫脹,頭部或頸部出現淋巴腺腫脹,或者係睪丸炎。 另外,大約有300萬份之1嘅機會會引致腦炎或者腦膜炎,但好返之後多數唔會出現長遠嘅不良影響。

群體免疫

雖然打疫苗係有可能出現以上嘅副作用,但大家要知道打咗之後就會擁有長期嘅免疫能力,加上可以起到群體免疫(Herd Immunity)嘅作用。

根據美國費城醫學院(The College of Physicians of Philadelphia)有關疫苗同群體免疫嘅資料,如果由病毒引起嘅疫症進入一個無免疫能力嘅群體,會有大部份群體成員都「中招」,尤其係自身免疫力較弱嘅小朋友同老人家(上圖)。

相反,如果群體入面有大部份人都已經接種疫苗,有咗免疫力。除咗佢哋自己免疫之外,亦可以間接保護埋無打疫苗同埋打咗疫苗但免疫力不足嘅群體成員,起到群體免疫嘅作用(下圖)。

群體免疫1

群體免疫2

圖片來源:CBHS Health Fund

縱使科學證實接種MMR混合疫苗可提高社區整體嘅防疫能力,但據傳媒報道指出,多年嚟仍然有唔少傳聞指出接種MMR疫苗有可能增加小朋友患上自閉症嘅風險。

傳聞其實源於1998年美國一份醫學報告,報告指MMR疫苗會增加小朋友患上自閉症嘅風險,報告後來被揭發造假。

即使傳聞已被拆穿,美國民眾對MMR疫苗嘅信心似乎仍未全完恢復,令到當地近年再出現麻疹爆發嘅情況。喺網絡資訊氾濫嘅年代,大家都要小心去分析唔同嘅傳言同消息,免得「聰明反被聰明誤」。

麻疹疫苗價錢

當你考慮完,決定係要去打MMR疫苗,都未必即刻有得打,因為依家市面上嘅麻疹疫苗出現供不應求嘅情況。

根據香港電台報道,喺麻疹疫情持續嘅情況下,唔少本地私家診所嘅麻疹疫苗都出現短缺情況,MMRV四合一疫苗(包括麻疹、流行性腮腺炎、德國麻疹混合疫苗及水痘疫苗)價錢高達$1,000-1,300,個別診所甚至收取$1,800一針(以上疫苗價格為2019年3月27日的消息)。

最後,衞生署衞生防護中心提醒,某啲人士係唔可以打麻疹疫苗嘅,包括:

  • 接種MMR混合疫苗後曾經出現嚴重過敏
  • 對明膠 (gelatin)或某啲抗生素曾經出現嚴重過敏
  • 患有癌症
  • 長期服用類固醇
  • 患有免疫系統疾病
  • 懷孕或計劃懷孕嘅女士(接種疫苗後3個月內唔適宜懷孕,須採取妥善避孕措施)
資料來源
顯示更多
分享
以上內容由 Bowtie 醫療資訊團隊 提供。內容僅供參考,不能取代合資格的醫護人員給予閣下之個人建議。
Bowtie

相關文章

【心臟病】冠心病發點自救?先兆、症狀、檢查、手術全面睇 【心臟病】冠心病發點自救?先兆、症狀、檢查、手術全面睇
疾病症狀

【心臟病】冠心病發點自救?先兆、症狀、檢查、手術全面睇

【鼻竇炎】發燒、流鼻涕是症狀?吃藥會自然康復嗎? 【鼻竇炎】發燒、流鼻涕是症狀?吃藥會自然康復嗎?
疾病症狀

【鼻竇炎】發燒、流鼻涕是症狀?吃藥會自然康復嗎?

小朋友持續發燒後果可以好嚴重!體溫幾度先算發燒? 小朋友持續發燒後果可以好嚴重!體溫幾度先算發燒?
疾病症狀

小朋友持續發燒後果可以好嚴重!體溫幾度先算發燒?

想了解更多資訊或優惠,
歡迎透過表格聯絡我們。
其他話題

客戶服務熱線

3008 8123
WhatsApp 對話

熱線及中心服務時間

星期一至五:上午 9 時至下午 7 時
星期六:上午 10 時至下午 2 時
星期日及公眾假期休息

電郵查詢

cs@bowtie.com.hk

© 2021 保泰人壽保險有限公司。版權所有。

我們檢測到您的瀏覽器已經過時。如要得到最佳的瀏覽體驗,請更新或使用其他瀏覽器。 知道了