作者
MasterJack
更新
2024-09-17
喺香港，大約有差唔多一半嘅註冊營養師都喺公立醫院服務市民，始終臨床營養先係營養師發熱發亮嘅領域嘛，另外有一半就會喺私營機構、非牟利機構、膳食服務工作或者私人執業。咁我哋響唔同領域做嘅嘢又有冇唔同？
另外亦都有一部份嘅營養師會喺衞生署工作，佢哋唔似公立醫院嘅營養師做咁多臨床工作，佢哋主要會向大眾宣傳營養知識同推廣健康飲食。
營養師有咩出路？
私人市場方面，好多非牟利嘅志願團體（Non-Governmental Organization，簡稱NGO）都會聘請註冊營養師去做一啲社區服務，例如向個別社區推廣健康飲食，好似講下講座，教下煮飯咁，有部份機構都會提供飲食治療。
有啲社福機構仲會搞社區飯堂或者送飯服務俾老人家或者有需要嘅人士，佢地就會搵註冊營養師去編寫食譜同餐單（好緊要嫁，我哋平時喺醫院安排俾病人嘅餐，出左院如果繼續需要但係病人又唔能夠自己準備嘅話，就靠晒呢啲服務嫁喇）。
|
NGO收費* |
|
|
新症（45分鐘） |
$300 – $650 |
- *由筆者提供，收費只作參考。
另外有啲全身投入膳食服務嘅註冊營養師，除左會編寫食譜同餐單外，仲會幫助研發新食品。同埋事實上，註冊營養師對生物、化學、食物及營養都有好深嘅認識，所以有部份會去咗做科研。
見一次營養師最貴$1,000蚊
至於私人執業嘅營養師，有部份會伙拍一啲私人執業嘅醫生或物理治療師，喺大型醫務所工作，有啲就自己單人匹馬開診所。而私人執業嘅同行就會多啲接觸需要減肥同增肥嘅朋友。
此外，我想喺度介紹吓註冊營養師仲有咩工作，其實我哋仲可以幫手設計︰
- 兒童營養
- 產前產後營養
- 手術前後營養
- 癌症營養
- 肝腎病營養（呢次真係戒口保平安呀，因為戒口對保存肝腎功能好重要）
- 糖尿病飲食（呢個就唔係戒口喇，反而係了解同學習點樣進食，並配合藥物去達至理想血糖水平）
- 腸胃病 / 敏感飲食
所以唔好再誤會註冊營養師就係 = 減肥 / 增肥，其實我哋都有好多唔同嘅專長！
|
私人執業營養師收費* |
|
|
新症（45分鐘） |
$500 – $1,000 |
- *由筆者提供，收費只作參考。
- 註：係香港，有10%人係有糖尿病（自己已知及未知），而且呢個數字係只會繼續上升。雖然呢個病咁common，但好多人竟然完全唔了解點樣去改善呢個病，仲有好多病友以為有咗糖尿病，食少啲或者唔食澱粉質就OK，但其實係錯嘅，實情係要定時定量咁進食。
好多病其實都係飲食唔健康引起，你食到病先嚟搵我哋其實已經遲咗，始終病向淺中醫、預防又勝於治療，最好都係及早學習正確嘅飲食習慣，去保持身體健康啦。
延伸閱讀
這篇文章有用嗎？
2
本文章內容由 MasterJack 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。此文章內任何與 Bowtie 產品相關的內容僅供參考及作教育用途，客戶應參閱相關產品網頁內詳細之條款及細則。
相關文章
