近年租船出海遊船河大行其道，但其實並非所有船隻都可以載客取酬，出海進行娛樂活動嘅。海事處就規定，船隻須領取「遊樂船隻牌照」，更要購買唔少於 $500 萬嘅第三者保險，先可以出租。
無論開船 P 定係夜釣墨魚，一般都視為上述嘅「娛樂活動」。為安全起見，各位租用船隻出海之前，都應該事先向船主或負責人查詢船隻係咪有牌照同已經買咗第三者保險；否則一旦遇上意外，保險公司有機會不作賠償，參加者就要自行承擔相關的醫療開支。
船隻嘅第三者意外保險一般只保障因各種意外引伸嘅醫療費用，由短暫傷殘至死亡都包括在內。然而，假如唔屬於人命傷亡嘅意外範圍，例如財物損失或者失竊，船隻嘅第三者保險就有機會唔受理，所以出海時，記得小心保管好自己嘅財物，貴重但不必要嘅物品就唔好帶上船啦，費事唔見咗，搞到唔開心啦。當然，坊間有部份家居保險包含「全球性個人財物」嘅保障，如果真係不幸喺船上邊遺失銀包或被人偷嘢，都可以向保險公司申請索償。
出海活動，最忌就係樂極生悲。唔少朋友都會購買個人意外保險，令自己多一個保障。然而，有時候即使船隻領有牌照，又有買第三者保險，保險公司都有機會不就意外作出賠償。第三保又好，自己本身嘅意外保又好，如果投保人喺意外發生前飲得太醉，保險公司有權以「受酒精影響個人判斷能力」為理由，而唔作賠償，所以大家出海時，最好都係小酌幾杯就好啦。此外，大家亦應該遵守船家嘅安全指示，例如著好救生衣，坐喺船上適當嘅位置等，否則保險公司同樣可以投保人疏忽為由，而拒絕賠償。
個人意外保其中一個着眼嘅事項係「由意外導致」。如果保險公司證實投保人嘅意外係由佢嘅長期疾病所致，例如心臟病等等，就有機會視之為保單範圍以外。因此，各位出海之前，最重要先衡量自己嘅身體健康狀況。買意外保之餘，亦應該選擇合適嘅醫療保險，確保自己得到更全面嘅保障，咁先可以安心又盡情咁享受夏日海上活動！
