健康生活

【減肥餐單】制定Keep Fit計劃前 營養師幫你糾正6大致肥誤解!

個個都減肥,唔通個個都想減肥咩?不論係男女老幼,香港人都愈來愈注重身型同健康,個個都話要減肥,各施各法。有啲人一日三餐跟足減肥餐單食嘢、有人狂做運動、有人甚至去食減肥藥,但都唔一定成功。今次Bowtie就請嚟註冊營養師MasterJack,為你糾正致肥誤解!
作者 MasterJack
日期 2019-04-03
更新 2020-09-21
目錄
1. 飲啤酒最易肥?2. 淨係做運動唔節食就減到肥?3. 食白飯係致肥元兇?4. 太夜食飯都會肥?5. 食齋無咁肥?6. 唔食早餐可以減肥?

1. 飲啤酒最易肥?

MasterJack:其實都係睇你飲幾多嘅啫。酒類飲品嘅熱量來源主要嚟自酒精。所以喺同等份量下,酒精濃度越高嘅話,熱量就會愈高。一齊睇吓個表:

每100ml(酒精濃度) 啤酒 (4-4.9%) 紅酒(12%) 威士忌(40%)
熱量(千卡路里) 36.6 79.4 205

如果只係飲100ml,咁啤酒嘅熱量絕對會係最低。不過,現實係好多時候飲啤酒嘅朋友都飲多過一罐,有時候甚至飲兩大杯(2 Imperial Pint係1,136ml,2 US Pint係946ml),咁就360Kcal 㗎喇。所以話怕肥唔飲啤酒嘅朋友某程度上都啱嘅,避免自己飲多咗嘛。

另外補充少少,好多人話啤酒糖份多所以肥,呢樣就唔啱啦,頭先講咗酒精先係主要熱量嘅來源,啤酒入面嘅糖份係每100ml大約2g左右,即係8Kcal啫。

2. 淨係做運動唔節食就減到肥?

MasterJack:其實完全靠運動嚟減肥係非常唔乎合經濟原則(成本效益)。

好簡單一個事實:一個160磅嘅人去健身室舉重1個鐘可以消耗到230Kcal(1)。一碗腩肉墨魚丸麻辣湯底米線嘅熱量係830Kcal(2), 求其一間粉麵舖嘅一碗雲吞麵熱量就係300Kcal(2), 即係話同樣係食碗麵, 你揀錯嘅話,果日就要去健身房舉2個鐘頭18分鐘嘅鐵嚟抵消返。 試問公務咁繁重嘅你又點可以再抽到呢啲時間出嚟呢。

但你千祈唔好誤會, 我唔係叫大家唔好做運動,反而非常鼓勵大家做運動。因為你只能夠透過做運動嚟改善心肺功能。只不過一心諗住運動就係減肥嘅全部的話,你就有啲被誤導啦。就減肥學嚟講,最重要始終都係飲食行先。

3. 食白飯係致肥元兇?

MasterJack:終於都等到你問呢條問題啦! 錯囉,錯晒!食紅米唔會肥,食糙米唔會肥,食白米都唔會肥。睇睇下面:

營養成份 提供熱量(每1克)
碳水化合物 4Kcal
蛋白質 4Kcal
脂肪 9Kcal
酒精 7Kcal

一睇個表就一目了然啦, 齋講熱量嘅話,幾時都唔輪到碳水化合物排第一,所以飯點會係致肥元兇?一碗飯嘅熱量其實大約係200Kcal左右,就算你一日三餐都食碗飯,都係600Kcal左右,所以一定係你平時食嘅餸比較肥。

可能會有人話:「唔係喎,食多咗嘅碳水化合物,用唔晒嘅話身體咪會將佢轉成脂肪儲起囉, 咁就會肥啦!」

的而且確, 身體係有機制將單糖轉成脂肪, 但其實因為個機制好複雜同埋好浪費資源嘅關係(身體要將單糖變成脂肪酸,過程係需要用能量㗎。即係用能量去轉化能量,身體其實都會覺得好無聊,好唔合成本效益),所以只係有好少部份多餘咗出嚟嘅碳水化合物, 先會被轉成脂肪儲起(3)。

相反,人類嘅腸胃係可以好有效率咁吸收食物入面嘅脂肪,用唔晒就簡單直接咁儲起。咁你話啦,食碳水化合物易肥,定係食脂肪易肥?

4. 太夜食飯都會肥?

MasterJack:夜食飯係唔會令到你肥,但係如果夜食飯,而又令你選擇一啲無咁健康嘅食物,咁就會令到你肥啦。

觀察性研究顯示晚飯時間與肥胖係無關連㗎(4),個研究搵兩班小朋友,一班就係夜晚8點前食飯,另一班就係夜晚8點後先食飯,結果係搵唔到晚飯時間同肥胖有關連㗎。

相反,有大量研究顯示始終都係食物入面嘅熱量先會引致肥胖(5)。所以,要返夜嘅朋友或者晏收工嘅你都唔好太怪罪自己份工,只要唔好亂食嘢就唔會肥。

減肥攻略-制定計劃前營養師幫你糾正致肥誤解

5. 食齋無咁肥?

MasterJack:如果你以為食齋無咁肥,咁就大錯特錯啦。「食齋」呢兩隻字其實好廣泛,純素主義(Vegan)、蛋素主義(ovo-vegetarianism)、奶素主義(lacto-vegetarianism)、奶蛋素主義(ovo-lacto-vegetarianism),仲有會食海產嘅(semi-vegetarianism)等等,通通都係「食齋」。

唔同嘅食齋方式老老實實又真係會對你嘅營養攝取有好大嘅影響,深到直頭可以寫篇論文。不過無論邊種「食齋」都好,其實點樣煮先係關鍵。舉個例,羅漢齋炒麵係齋菜,一碟有成850Kcal,一份冷蕎麥麵(醒唔醒起佢都係齋先?),先得300Kcal。其他齋舖啲素肉好多都係預先炸過,吸晒油,我就唔使多講啦。所以我覺得「食齋」就唔一定無咁肥嘅。

6. 唔食早餐可以減肥?

MasterJack:我只可以答你唔會,而且仲會更加肥,更加唔健康。根據小弟嘅經驗,普遍嚟搵我幫手減肥嘅朋友,見我之前每日都係食得好少餐,而且好多都係無食早餐嘅習慣當我叫佢哋食返早餐,同埋仲要每日食好多餐之後,全部都開始減到磅。

其實你要明白,減肥唔係要盲目追求食少啲熱量(卡路里)。我哋人類其實好先進,識得自我適應同調節。有樣嘢叫新陳代謝,佢主宰住我哋每日要用幾多能量。

當我哋食少咗,新陳代謝其實係會減慢啲去慳住嚟用,到你再食嘢嘅時候,身體會更加吸收,令到你儲起更加多。所以你越唔食嘢,最終只會越肥,你係唔夠自己嘅「新陳代謝」鬥㗎,所以你係要同佢做好朋友,令佢轉換快啲去幫你減肥。

總括嚟講,由早餐開始做起,少食多餐,先可以幫到你改善新陳代謝,幫你加快消脂。

資料來源
顯示更多
分享
本文章內容由 MasterJack 提供並只供參考,不代表 Bowtie 立場,Bowtie 對任何人因使用或誤用任何信息或內容,或對其依賴而造成的任何損失或損害,不承擔任何責任。
Bowtie

相關文章

【產後坐月】5大必讀禁忌 附餐單和湯水建議 【產後坐月】5大必讀禁忌 附餐單和湯水建議
健康生活

【產後坐月】5大必讀禁忌 附餐單和湯水建議

【深蹲】為免拉傷肌肉,專業教練示範如何正確做SQUAT! 【深蹲】為免拉傷肌肉,專業教練示範如何正確做SQUAT!
健康生活

【深蹲】為免拉傷肌肉,專業教練示範如何正確做SQUAT!

【驗孕】哪種方法最準確?注意事項和正確使用方法 【驗孕】哪種方法最準確?注意事項和正確使用方法
健康生活

【驗孕】哪種方法最準確?注意事項和正確使用方法

想了解更多資訊或優惠,
歡迎透過表格聯絡我們。
其他話題

客戶服務熱線

3008 8123
WhatsApp 對話

熱線及中心服務時間

星期一至五:上午 9 時至下午 7 時
星期六:上午 10 時至下午 2 時
星期日及公眾假期休息

電郵查詢

cs@bowtie.com.hk

© 2021 保泰人壽保險有限公司。版權所有。

我們檢測到您的瀏覽器已經過時。如要得到最佳的瀏覽體驗,請更新或使用其他瀏覽器。 知道了