營養貼士
營養貼士 什麼是生酮飲食法？能否長期減肥？營養師同你分析利弊！
呢期最熱門嘅減肥飲食方法都真係非生酮飲食法（英文︰Ketogenic Diet）莫屬喇。我相信周圍都進行緊熱烈討論，而你亦都聽過或睇過唔少相關資訊。我今次就想以營養學嘅角度講吓個人睇法，正反兩面都講吓。首先，我想講吓呢飲食方法嘅背後理念。生酮飲食其實係一種高脂肪，適中蛋白質，非常低澱粉質嘅飲食習慣。提倡呢種飲食法嘅人認為減少澱粉質進食，令到每日卡路里攝取量中，有5%至10%來自澱粉質，從而幫助你減肥 。
生酮飲食部分餐單
有咩食得？有咩唔食得？ | |
飯、麵、麵包 ❌ | A5和牛、雞皮，豬油，牛油 ✅ |
呢個飲食方法最適合一啲本身對澱粉質類食物冇乜好感嘅人，可以打正旗號去唔食飯、麵、麵包之類嘅野。另一方面，佢哋就可以好放肆咁食「油淋淋」嘅食物，例如A5和牛，雞皮，豬油，牛油，因為生酮飲食並無限制呢類食物。
生酮飲食法最大好處並非減肥
呢種飲食方法係會好飽肚，因為你食左好多油，咁你之後就唔會有心癮去搵零食架喇。
當然有研究顯示係有效啦，甚至比「低脂飲食」同「低澱粉飲食」有更大減磅效果添。
不過呢種飲食最大嘅好處唔係減重，而係幫助到有兒童癲癇問題嘅小朋友去減低癲癇發作率。其實早起1920年代開始，生酮飲食法已經有人提出，不過係用嚟控制兒童癲癇，我就唔知點解最近突然流行起嚟，仲用嚟減輕體重。
生酮飲食有何缺點？
其實呢種飲食方式最大問題係「難入口」，所以好難長期食落去。試諗下，日日都要大大啖將啲油淋淋嘅食物放入口喎。
而且餐單嘅營養比例唔係好均衡，你諗下5%卡路里可以來自澱粉質，以每日1500Kcal為例，即係75Kcal咋，想食個橙都唔得呀，政府都有講啦，要維持健康飲食，每日最少要兩個水果喎。仲有其他好多有益嘅食物都食唔到，除左粉、麵、飯，全麥產品同豆製品都食唔到。
所以，長期咁食法，最令人擔心係進食者有機會出現「部分營養缺乏症」，例如缺少維他命b雜同鎂質之類。同埋好難食得夠每日所需嘅纖維。
另外，講明生酮飲食法，就梗係會產生酮啦。酮其實有輕微毒性嘅，儲埋儲埋就會出現酮症（Ketosis），症狀包括頭痛，頭暈，疲累，失眠，便秘等，而且個口仲會好臭添。不過目前都好似暫時未有報告過因為ketosis而死亡嘅個案，touchwood。
話時話，係有好多研究証明減重成效，但全部都係短期研究黎，你問我兩年之後仲可唔可以一路減到落去，或者會唔會反彈，我就答你唔到喇。
所以，要唔要進行呢個飲食法，最好分析好利弊以及向營養師咨詢意見再決定啦。
延伸閱讀
這篇文章有用嗎？
2
4
本文章內容由 MasterJack 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。此文章內任何與 Bowtie 產品相關的內容僅供參考及作教育用途，客戶應參閱相關產品網頁內詳細之條款及細則。
相關文章
