公立醫院爆煲？3個趁早買份自願醫保的理由！

政府提供公營醫療網絡，原意係為市民提供基本門診同住院保障，唔少市民認為一旦患上頑疾，去公立醫院求診就得，使咩買醫療保險。

不過，隨住香港人口不斷增長，最近新聞都有報道講到，公立醫院長期人山人海，負荷近乎「爆煲」。大家如果想單靠政府保障你嘅健康人生，恐怕就未必能夠如願啦！

隨住香港人口增長同老化，公立醫院輪候人數長期「逼爆」，就好似剛剛過去嘅冬季流感高峰期，急症室輪候時間最長要成8個鐘，最短普遍都要等2個鐘。就算能夠順利住院，病床佔用率經常超過100%，個別醫院更加去到成120%，即使係兒童病床都接近100%。面對病人逼爆情況，醫生護士廢寢忘餐，難免影響醫療質素。

如果患上長期病患，覆診時間短則半年至1年，長則要等成3年咁耐，有機會延誤病情。如果自己擁有一份醫療保險或自願醫保，就可以喺公營醫療以外獲得更多選擇，保障自己同家人健康。

唔少人都恃住後生，以為患病要「入廠」嘅機會好微，但其實都市人飲食失衡，又要面對沉重壓力，隨住年齡上升，唔少病痛都喺步入中年之後出現。

根據醫管局公佈 2016 年嘅數據顯示，癌症數字不斷攀升，當年總共有31,468人患上癌症，創歷史新高，超過14,000人因癌症而死。公營醫療網絡的確能提供最基本的保障，但未必能提供最舒適嘅治療，以癌症為例，患者接受化療等傳統方法醫治，要承受極大痛楚。

如果想加快康復步伐，就需要龐大嘅「水喉」支付藥費。根據醫管局「藥物名冊」，只有標準藥物至可以獲得資助，唔少頑疾藥物都未納入安全網，例如抗癌嘅標靶藥物，費用往往以5位數字起標，患者同家人需要繳付巨額支出先至可共度難關。

雖然社會上有社福基金支援有需要家庭，但對於患病人士嚟講仍然係杯水車薪。為咗避免家人因自己患上頑疾而揹上沉重負擔，儘早趁健康時供一份比較全面嘅自願醫保，就可以終身獲得保障，幫你分擔咗唔少未來可見嘅風險。

以2017年為例，全球基本通脹率平均係1.7%，但根據Willis Tower Watson 喺2018年做嘅全球醫療趨勢研究，全球同年醫療服務費竟然升咗成4.8%，通脹足足係基本消費嘅3倍有多！因此，唔想捱貴醫療費嘅話，及早買一份啱自己嘅醫療保險的確係好緊要。

你或者會問，咁每個月咪要花多一筆錢嚟買醫保？其實，喺2019年4月推出嘅自願醫保計劃設有提供較高保障嘅「靈活計劃」之餘，亦提供收費較低廉嘅「標準計劃」，保障範圍涵蓋住院、門診手術，以至精神健康治療，為保險市場提供更多選擇。大家可以根據自己嘅負擔能力，喺保險產品中物色最適合嘅醫療計劃。