保險知識
【交通意外】意外處理程序、和解及保險索償需知
香港車多人多，根據運輸署的道路交通意外統計，2020年首七個月的交通意外宗數合計8,370宗，傷亡人數超過1萬人。司機同行人應時刻注意道路安全，一旦發生交通意外，又應該點處理？想和解或Claim保險又可以點做？
Bowtie資訊團隊綜合各種交通意外嘅處理方法，教你Claim保險，以及和解時嘅注意事項，當意外發生時，亦能少一份徬徨！
遇到交通意外，應該點處理？
普遍交通意外都係因為「跟車太貼」、「超速駕駛」、「車輛失控」、「不當轉換行車線或轉向」等4大因素引起，遇到唔同情況係需要採取唔同處理方法：
1. 中途壞車
✅將壞車移離行車道，停泊喺路邊位，亮起壞車警告燈，並盡快報警求助
✅駕駛者應先確保路面安全後才離開車輛，否則應留喺車內等待救援
✅可企近車尾等待救援
❌唔好企喺車前或試圖修理壞車
2. 意外涉及人命傷亡
✅必須停車，並亮起危險警告燈
✅盡快報警，報告受傷人數同傷勢情況
❌未經警員同意，唔可以移動或干擾車輛（除非救人或救火等緊急情況）
3. 意外涉及動物傷亡
✅停車並亮起危險警告燈
✅報警求助
4. 意外車輛有危險品
✅停車並亮起危險警告燈後，立即遠離車輛
✅盡快通知警員及消防員
5. 高速公路上遇到意外
✅先將車輛移至安全地方（路肩或最左路邊）再停車，並亮起危險警告燈
❌唔好留喺車入面，盡量搵個安全地方等待救援（如防撞欄）
✅報警時，應向警員講清楚幹綫號碼同里程標誌
❌唔好喺路面上停留或走動
6. 隧道內遇到意外
✅停車熄掉引擎，留下車匙，並亮起危險警告燈
✅用隧道內嘅緊急電話通知隧道控制室，等待隧道巡邏隊或管理員到場協助
✅如發生火警，應啟動火警鐘，並用隧道管道旁嘅滅火筒救火
7. 撞到政府財物或公共物件（如電燈柱、防撞欄等）
✅停車並亮起危險警告燈
✅將車輛移至安全地方後，報警求助
賠償金額會因唔同地區或物件嘅造價而異，根據傳媒報導，防撞欄嘅價值可達$9萬︰
| 政府公物 | 賠償計算及價目 |
| 欄杆 | 每米約$400 |
| 路牌 | 約$500 |
| 安全島燈箱 | 約$1,000 |
| 消防水龍頭 | 約＄8,000至 $9,000 |
| 防撞欄、風琴式防撞欄 | 約$90,000 |
| 停車收費錶、錶杆 | 約$310至$1,400元不等 |
| 紅綠燈、電燈柱 | 約$15,000 |
即使意外不涉及傷亡或沒有嚴重損毀，都應該要即時停車，並將車輛移到附近安全地方。
為免意外後發生火警，應移去易燃物體並關掉引擎。如果油缸破漏，可以喺安全情況下拔掉汽車電池嘅電綫。
司機亦應拍攝現場照片或短片，抄低車牌號碼、意外位置、受損財物及目擊證人資料，以及乘客及傷者的個人資料及聯絡方法，以作記錄及保險索償之用途。
輕微事故：想和解要點做？
發生輕微交通事故時，例如車輛輕微碰撞或刮花等，只要無涉及人命傷亡，亦無政府或者第三者財物損毀，雙方就可以考慮進行和解。
和解嘅條件必須得到雙方同意，例如係甲方願意支付乙方$5,000和解金額作為乙方車輛嘅維修費用，乙方承諾不再追究等。如果雙方能夠達成協議並和解，就唔需要報警或採取進一步行動，事情亦告一段落。
和解建議嘅做法係雙方簽署和解協議書，以保障各自權益。協議書上應清楚列明雙方的姓名、身份證號碼、車牌號碼、事發的時間、地點及經過等，並須由雙方簽名作實，最好影埋相做記錄。
如果車輛因意外損毀，車主/司機未能即時評估維修費用，或者需要稍後時間先可以去車房/ 原廠進行維修報價。咁嘅情況下，雙方唔能夠即時和解，就應該先報警處理，等警方可以正式記錄事件，以便日後進行上述嘅和解程序，或者其他形式嘅追究。警方到場確認無人受傷，以及無政府或第三者財物損毀之後，會向雙方提供報案編號，以便雙方跟進。
如果事發後雙方一直未能達成共識，咁希望索償嘅一方就要先聯絡警方錄口供（警方建議於意外後5個工作日內），等警方可以循刑事方向調查。等法庭有正式判決後，索償一方就可以聯絡對方嘅車保承保保險公司，要求賠償。
即使簽署和解協議，車主都應該盡快將意外上報保險公司，唔好因為怕會失去「無索償折扣」(NCB/ NCD)而唔報備。因為當對方或者第三者反口，或者係佢哋日後提出索償嘅話，保險公司都可以幫車主承擔賠償。喺事件完全解決後，車主可以向保險公司提出撤回索賠，咁車主就可以攞返原有嘅NCB/ NCD。
保險點幫到你？
如果不幸遇到交通意外，不論你係駕駛者、乘客定係行人，車輛嘅汽車保險同埋個人嘅意外保險都可能幫到你：
汽車保險
香港法例規定車主必須購買汽車第三者風險保險（簡稱「三保」），否則即屬違法。「三保」會對車主以外第三者（包括車上乘客）嘅人身傷亡及其財物損失作出賠償；部份車主會買綜合汽車保險（簡稱「全保」）。
「全保」除咗有「三保」嘅保障之外，如果車輛因水災、火災、交通意外及盜竊等帶來損失，亦可獲賠償。
意外保險
如果你係司機，即使部車有購買「全保」/「三保」，車保都唔會就你個人嘅人身傷亡作出賠償，所以司機可以考慮為自己購買個人意外保險，先可以就醫療費用提出索償。
如果該意外涉及觸犯法律，一般保險公司會搜集意外相關資料，視乎情況作出賠償。根據《觸犯或企圖觸犯法律行為》豁免條款，保險公司毋須賠償因非法活動引致的索償。換言之, 所有觸犯酒後駕駛條例的案件均不會獲得賠償。
要Claim意外保定車保，當事人都要向保險公司提交意外相關資料，包括涉事嘅車牌號碼、意外發生經過、位置、目擊證人或受傷人士資料、司機嘅香港身份證及駕駛執照副本、乘客資料、車輛登記文件副本、意外相關相片等；如已報警，司機亦要提供警方口供副本及警方案件編號，以及「呼氣測試報告」和「擬控告通知書」。
剛才提到，如果喺交通意外中受傷，係可以利用意外保險，就有關醫療費用索償。
資料來源
本文章內容由 Bowtie 團隊 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。
相關文章
其他話題