假如個人財政係一盤生意，你當然希望自己能夠賺錢，而唔係蝕盤貨。但點樣先可以管好自己盤數？Planto 同你分享6個職場新鮮人應避免嘅錯誤：
1. 買太多非必要嘅保險產品
畢業之後，你身邊總有幾個朋友或舊同學，忽然約你聚舊，然後推銷保險。買保險，有助你在發生突發事故、失去主要收入來源時，得到基本生活保障，但購買前要做足功課，分辨邊啲係對你最有用嘅產品。
譬如說，廿幾歲的你，未必要咁早開始供年期長而保費較貴嘅儲蓄人壽保險；相反，有保障成份嘅人壽同醫療保險就越早買越平，可優先考慮；好多公司都有提供一份最基本嘅醫療保障俾僱員，你亦要衡量是否夠用。
買有投資成份嘅保險時，記得細閱條款，了解張保單有幾多價值屬於「非保證」、提早cut單會損失幾多等重要事項。
請緊記量入為出，唔好為咗挨義氣幫朋友開單，而買下你並唔需要嘅保險產品。如果朋友正不斷游說你買保險，而你剛好有需要，請評估一下呢位朋友是否誠實可靠，以及會否喺保險業長期發展，避免你日後有需要claim賠償時，先發現條款同你理解嘅「貨不對辦」。
如到時朋友已經離職，你嘅保單可能淪為冇人跟進嘅「孤兒單」。就算保險公司搵咗另一個Agent幫你跟，佢好可能只會提供基本服務。
2. 太早搬出嚟租樓住
大學生喺住hall生涯習慣自由自在，或唔再想與家人同住，惟香港租金騰貴，租住市區一個300至400呎小單位，索價通常過萬蚊，大學畢業生平均起薪只有約$15,000，一個人租樓，幾可肯定用咗一大部份糧，即使二人合租，租金支出亦可能超過收入一半。對大多數畢業生而言，唯有租住較平嘅共居空間或劏房，先可能維持到儲蓄目標。
搬出嚟住無非為自由，但若此舉反而令你受租金束縛，豈非本末倒置？如果，家人能為你提供棲身之所，請好好考慮繼續與家人同住，既可慳番租金，每月亦可向父母上繳較高金額嘅家用，報答養育之恩。
3. 花太多錢消遣娛樂
食一次自助餐花費$500，買一部新手機要$7,000，去日本玩一轉要過萬蚊，呢啲享受全部索價不菲。初嘗自主理財嘅你，難免心癢難耐，咩都想試一試，如是者，你有機會入不敷支。
要維持work life balance，適當嘅消遣娛樂係必要的，但緊記量入為出。想放鬆心身，你唔係事必要出國，香港嘅自然風光從來不輸鄰近亞洲國家，留港行山，到海灘暢泳，都係平價享受。
手機有冇必要年年換？蘋果預期iPhone使用壽命為3年，你未必需要太早換機，如果嫌續航力不足，換粒電池會係較環保嘅做法。飲食方面，有時候放棄豪飲豪食，走進隱世平民小店，品嘗風味地道嘅本土美食，亦係廉價而寫意嘅滋味。
4. 忽略MPF戶口
你可能喺過去做暑期工時，已經擁有幾個強積金戶口。戶口金額太少，或令你大感食之無味，你甚至可能連自己名下有幾多個強積金戶口忘記得一乾二淨。
儘管呢一刻你嘅強積金賬戶金額雖少，亦不失為職場新鮮人初體驗投資嘅好機會，只要妥善管理、日積月累，他朝你會擁有一筆可觀退休金。
想確認自己擁有幾多個強積金戶口，請填妥並向積金局遞交「個人帳戶資料查詢表格」，查清賬戶後，你可把現有多個戶口重新整合，以方便管理，方法係填妥「計劃成員整合個人帳戶申請表」，交俾你所選定嘅受託人。
你亦可到積金局個人電子賬戶查詢網站或下載專用嘅iOS或Android應用程式。
5. 管理信用卡不善
開始全職工作、擁有收入證明後，有人會鬆毛鬆翼，申請多張信用卡，瘋狂購物，滿足學生時代抑壓多年嘅購買慾。但用信用卡簽賬必須準時還款，任何遲找卡數嘅記錄，都會喺你個人信貸記錄留下5年烙印，他朝向銀行申請按揭貸款，亦可能受影響。
畢業生擁有一至兩張信用卡已經足夠，否則申請得太多，張張卡還款日期唔同，會增加忘記還款風險。如果你擁有多張credit card，建議你下載返個智能理財app，喺還款日前自動提醒你準時找卡數。
6. 缺乏全盤目標與計劃
學周星馳經典對白話齋：「做人如果無夢想，同條鹹魚有乜分別？」工作賺錢，並唔係只為生存，你必須有夢想、有目標，先有動力發奮。儲錢亦一樣，請問問自己，我的錢儲來做什麼？為了讀PHD去旅行？買樓？買車？
建議你可用坊間的理財app追蹤開支及制定個人預算，檢討支出是否用得其所，從而改善理財，並開始為置業、旅遊、結婚等目標好好儲錢。
這篇文章有用嗎？
1
本文章內容由 Planto 提供並只供參考，不代表 Bowtie 立場，Bowtie 對任何人因使用或誤用任何信息或內容，或對其依賴而造成的任何損失或損害，不承擔任何責任。此文章內任何與 Bowtie 產品相關的內容僅供參考及作教育用途，客戶應參閱相關產品網頁內詳細之條款及細則。
相關文章
